Партугалія і Харватыя паказалі найгоршы футбол на Еўра, але пірэнейцам пашанцавала больш
За 117 хвілін каманды ні разу не трапілі па варотах суперніка.
18-гадовы партугалец Рэнату Саншаш, які выйшаў на замену, — адзіны, хто спрабаваў збаламуціць футбольнае балота.
Чарговы матч 1/8 фіналу паміж Партугаліяй і Харватыяй меркаваўся як ўпрыгожанне гульнявога дня. Кожная з гэтых зборных магла ўсур’ёз прэтэндаваць на перамогу на Еўра. Букмекеры лічылі каманды роўнымі па сіле, каэфіцыенты складалі каля 2,8:1 на выйгрыш любой з іх.
Аднак нейтральныя заўзятары сыходзілі са стадыёна ўшчэнт расчараванымі. Аналізаваць матч будзе цікава толькі для трэнераў — за 90 хвілін асноўнага часу ніводная з каманд не тое што не забіла гол, а нават ні разу не патрапіла дакладна па варотах! Матч можна лічыць найгоршым на гэтым Еўра. Калі б пасля гульні з турніра вылецелі і Партугалія, і Харватыя, здаецца, ніхто б не расстроіўся.
Аднак паколькі нічыей быць не магло, гледачоў чакалі дадатковыя 30 хвілін пакутаў.
Развязка наступіла за тры хвіліны да канца, на 117-й хвіліне. Харваты прабілі ў штангу, і адразу ж партугальцы змаглі правесці контратаку. На ўдар вывелі Крышціяну Раналду. Варатар харватаў змог адбіць яго стрэл, але Рыкарду Кварэжма заставалася закалаціць мяч ў паўпустыя вароты.
1:0 — і ў чвэрцьфінал праходзіць Партугалія. Наперадзе яе чакае матч з Польшчай.
