Dyrektar łukašenkaŭskaha saŭhasa «Haradziec» staŭ hubiernataram Minščyny: piać faktaŭ pra Anatola Isačenku
Alaksandr Łukašenka 4 lipienia zrabiŭ važnaje kadravaje pryznačeńnie. Staršynioj Minskaha abłvykankama staŭ Anatol Isačenka, choć niekatoryja vydańni aktyŭna svatali na hetuju pasadu dyrektara MTZ Fiodara Damacienku. Chto ž taki hety Anatol Isačenka, pra jakoha tak mała infarmacyi?
Naradziŭsia ŭ Rasii
Anatolu Isačenku 51 hod. Jon naradziŭsia ŭ vioscy Kuźniec Klincoŭskaha rajona Branskaj vobłaści. Heta zusim maleniečkaja vioska na bierazie raki Kuźniečyk. Škoły svajoj u Kuźniacy nie było, Anatol chadziŭ vučycca ŭ Ražnoŭskuju škołu.
Kali pryjšoŭ čas pastupać, to Isačenka padaŭsia vučycca ŭ Horackuju sielskahaspadarčuju akademiju. Dla Klincoŭ — heta nie daloki śviet, usiaho 250 kiłamietraŭ. Da taho ž Bransku 180 km. Tak što heta nie byŭ śviadomy vybar na karyść Biełarusi, a adna z samych blizkich navučalnych ustanovaŭ ad miesca naradžeńnia.
Papracavaŭ u Horackim rajonie
Dalejšy žyćciovy šlach Anatola Isačenki dastatkova padobny da losa kiraŭnika Biełarusi. Pa raźmierkavańni chłopca adpraŭlajuć pracavać inžynieram u kałhas «Savieckaja Biełaruś» Horackaha rajona. I tak los Isačenki bolš čym na 10 hadoŭ pieraploŭsia akurat z Horackim rajonam. Jon papracavaŭ hałoŭnym inžynieram, a taksama namieśnikam staršyni kałhasa ŭ mnohich haspadarkach rajona.
«Chleb na stale — mir na ziamli. Hetaja mudraja iścina spradvieku słužyła viaskoŭcam i ŭsim, chto maje dačynieńnie da chleba nadzionnaha, zapavietnym aryjenciram ŭ spravach žyćciovych. Užo potym źjaviłasia kryłaty vyraz: «Budzie chleb — budzie i pieśnia». Choć, pa sutnaści, heta toje ž samaje. Jość chleb — značyć, zaŭsiody budzie pad mirnym niebam śviata ŭ domie», — kazaŭ u adnym ź intervju Anatol Isačenka.
Uznačalvaŭ kałhas Łukašenki
U 2000 hodzie Anatola Isačenku pryznačajuć dyrektaram saŭhasa «Haradziec» Škłoŭskaha rajona. Taho samaha, adkul na prezidenctva pryjšoŭ Alaksandr Łukašenka. Viadoma, što aby-kaho ŭ rodnyja miaściny Łukašenka pryznačać nie budzie, tym bolej u pieršyja hady kiraŭnictva.
Vyhladaje, što pracaj Isačenki ŭ «Haradcu» byli zadavolenyja, pakolki ŭžo praz dva hady jaho zabrali pieršym namieśnikam staršyni Škłoŭskaha rajvynkama.
Namieśnik staršyni Partyi BNF Ryhor Kastusioŭ, los jakoha byŭ ciesna źviazany sa Škłoŭskim rajonam — sielskaj haspadarkaj i ŽKH, — kaža, što nieadnarazova sutykaŭsia ź Isačenkam padčas pracy. «Viedajecie, vielmi ciažka pra jaho niešta sfarmulavać. Možna śmieła skazać, što jon nie vykabłučvaŭsia. Prosta pracavaŭ i ŭsio», — kaža Kastusioŭ.
Karjera ŭ Mahilovie
Paśla Škłova Anatola Isačenku na niejki termin jašče pryznačyli pakiravać Kiraŭskim rajvynkamam. A ŭ 2008-m adbyŭsia pieršy sapraŭdy istotny ŭźlot Isačenki ŭ karjernaj ijerarchii. Jaho pryznačajuć namieśnikam staršyni Mahiloŭskaha abłvykankama pa sielskaj haspadarcy. Cikava, što Isačenku jašče pradstaŭlaŭ Barys Batura, jakoha ŭ toj samy hod pieraviaduć u Saviet Respubliki, a potym pryznačać hubiernataram Minščyny.
«Nie ŭsio atrymlivałasia, ale my nie apuskali ruki, a ŭvieś čas šukali novyja padychody da vyrašeńnia prablem: imknulisia pamienšyć vydatki vytvorčaści, racyjanalna vykarystoŭvać biudžetnyja srodki, umacoŭvać dyscyplinu. I hetyja miery prynieśli vyniki. Užo na praciahu šerahu hadoŭ Prydniaproŭski kraj namałočvaje bolš za miljon ton zbožžavych kultur», — kazaŭ Isačenka.
Na hetaj pasadzie Isačenka adpracavaŭ da 2014 hoda, paśla čaho staŭ staršynioj Mahiloŭskaha savieta deputataŭ.
Niadoŭhaja praca na Minščynie
U śniežni 2016 hoda Isačenku, jaki ŭsio žyćcio byŭ źviazany z Mahiloŭščynaj, dastatkova niečakana pierakidvajuć u Minskuju vobłaść. Jon stanovicca pamočnikam prezidenta pa hetym rehijonie.
«Vaša zadača — bačyć usio, što adbyvajecca ŭ rehijonie. I vy aktyŭna pavinny ŭmiešvacca ŭ pracu kadraŭ. Nie naŭprost. Praz hubiernatara — padkazvać, dapamahać, ni ŭ jakim razie nie padmianiajučy jaho. Tak, vy pavinny pracavać na pazityŭ, u adnoj źviazcy z hubiernataram. Ale ŭ vas svaja praca, svoj kirunak», — tak nakazvaŭ Isačenku Łukašenka.
Sam ža Isačenka pryznavaŭsia, što adčuvaje chvalavańnie ad novaj pasady. Z Šapiram jon byŭ znajomy jašče ŭ čas pracy taho ministram sielskaj haspadarki, a Isačenka kuryryvaŭ sielskuju haspadarku ŭ Mahiloŭskaj vobłaści.
Takim čynam, Anatol Isačenka adpracavaŭ u Minskaj vobłaści ŭsiaho siem miesiacaŭ pierad tym, jak stać hubiernataram.