Kiraŭnik MUS padziakavaŭ milicyjantam za strymanaść padčas vybaraŭ
Ihar Šunievič adznačyŭ vysokuju asabistuju dyscyplinavanaść i vytrymku supracoŭnikaŭ orhanaŭ unutranych spraŭ i vajskoŭcaŭ unutranych vojskaŭ padčas kampanii pa vybarach prezydenta.
«Ad imia kiraŭnictva Ministerstva ŭnutranych spraŭ i siabie asabista vykazvaju padziaku asabovamu składu za dobrasumlennaje vykanańnie słužbovych zadačaŭ, vysokuju dyscyplinu i strymanaść, jakija dali mahčymaść zabiaśpiečyć praviadzieńnie vybaraŭ prezydenta Respubliki Biełaruś na vysokim arhanizacyjnym uzroŭni», — adznačyŭ ministar.
U peryjad z 5 pa 12 kastryčnika ŭvieś asabisty skład MUS byŭ pieraviedzieny na ŭzmocnieny varyjant niasieńnia słužby. Masavuju akcyju z nacyjanalnymi ściahami napiaredadni vybaraŭ i stychijnuju akcyju pratestu ŭ dzień vybaraŭ nie razhaniali, choć padčas apošniaj zatrymali piacioch anarchistaŭ, taksama adznačanaja śpiešna spynienaja sproba skłaści pratakoł na 17-hadovaha chłopca. Paśla vybaraŭ adbyvalisia zatrymańni na padstavie vykarystańnia nacyjanalnaj symboliki: kiroŭcu ź bieł-čyrvona-biełym ściaham adpuścili praź dźvie hadziny zatrymańnia, a futbolnych fanataŭ z šalikami z «Pahoniaj» pakarali štrafami.
«Vybary prajšli ŭ strohaj adpaviednaści z zakanadaŭstvam Respubliki Biełaruś, spakojna, bieź nijakich uzrušeńniaŭ. Usio nieabchodnaje dla hetaha my zrabili», — zaklučyŭ Šunievič.
U peryjad kampanii pa vybarach prezydenta ŭ Miensku prajšło niekalki akcyjaŭ apazycyi. Supracoŭniki milicyi nikoha na ich nie zatrymlivali, na arhanizataraŭ skłali pratakoły ab administracyjnych pravaparušeńniach.