U Minsku znoŭ sprabavali zachapić zakładnika
Stali viadomyja padrabiaznaści incydentu, jaki adbyŭsia dniom 23 kastryčnika ŭ kramie ŭ padziemnym pierachodzie kala ŭniviermaha «Biełaruś» na Partyzanskim praśpiekcie ŭ Minsku. Učora HUUS Minharvykankama paviedamlała ab tym, što niejki mužčyna pahražaŭ dźvium žančynam raźbitaj butelkaj.
Jak paviedamiŭ načalnik adździeła prakuratury Minska Aleh Kandarevič, nasamreč adbyŭsia zachop zakładnika. Prakuratura sankcyjanavała ŭziaćcie pad vartu mužčyny 25 hadoŭ, raniej sudzimaha za vymahańnie i zaviedama padmannaje paviedamleńnie ab rychtavanym vybuchu. U dačynieńni da jaho raspačata sprava pa častcy 1 artykuła 291 KK (zachop zakładnika). Zakanadaŭstvam za heta praduhledžana pazbaŭleńnie voli ad 5 da 10 hadoŭ.
Kandarevič raskazaŭ, što, budučy ŭ kramie, mužčyna prystaviŭ da horła pradaŭščycy «ružačku», sam vyklikaŭ milicyju i zapatrabavaŭ adpuścić jaho brata ź SIZA № 1. U advarotnym vypadku jon pahražaŭ zabić žančynu. Na miesca nadzvyčajnaha zdareńnia vyjazdžaŭ načalnik HUUS Minharvykankama Alaksandr Barsukoŭ, jaki vioŭ sa złačyncam, što zachapiŭ zakładnika, pieramovy. U peŭny momant mužčynu ŭdałosia abiasškodzić biez prymianieńnia zbroi. Žančynie surjoznych paškodžańniaŭ nie naniesiena.
