Ананіч: Патрэбныя серыялы па матывах беларускай гісторыі
«Беларускае медыйнае поле неабходна пашыраць нацыянальным кантэнтам», — цытуе словы міністра інфармацыі Ліліі Ананіч БЕЛТА.
«Мы жывём у досыць канкурэнтным асяродку: спажыўцам даступныя тысячы і сотні перыядычных выданняў і тэлеканалаў: як беларускіх, так і замежных. Менавіта таму нашым медыя неабходна павялічваць колькасць нацыянальнага кантэнту», — адзначыла Лілія Ананіч.
Паводле словаў Ананіч, беларускім тэлеканалам неабходна замахнуцца на сур'ёзныя праекты: гаворка аб стварэнні беларускіх серыялаў і тэлефільмаў.
«Варта надаць увагу слаўнай беларускай гісторыі, казаць аб сацыяльных дасягненнях дзяржавы, даносіць кожнаму думку, што толькі мы самі адказныя за сябе, сваю сям'ю і краіну», — падказала кірунак працы Ананіч.
Пры гэтым варта нагадаць, што апошні гучны дзяржаўны праект у галіне кінематографа — фільм «Мы, браты», скончыўся поўным правалам: на пачатак 2016 года гэты палітызаваны фільм адбіў у пракаце каля 40 тысяч даляраў пры ацэначным бюджэце ў 5$ мільёнаў.
