Лукашэнка падпісаў указ аб ліквідацыі Беларускай транспартнай пракуратуры
Аляксандр Лукашэнка 1 кастрычніка падпісаў указ № 463 аб ліквідацыі з 1 снежня 2014 года Беларускай транспартнай пракуратуры, паведамляе прэс-служба прэзідэнта.
Яе функцыі перадаюцца Генеральнай пракуратуры і пракуратурам абласцей. Спецыялізаваныя транспартныя пракуратуры, якія знаходзяцца ў падпарадкаванні Беларускай транспартнай пракуратуры, будуць перападначаленыя пракуратурам абласцей.
«Транспартныя пракуратуры на месцах захоўваюцца для забеспячэння кваліфікацыйнага нагляду за выкананнем заканадаўства на аб'ектах транспарту і выкананнем законнасці ў дзейнасці органаў унутраных спраў на транспарце»,— растлумачылі ў прэс-службе.
«Такая рэарганізацыя скіраваная на ўдасканаленне сістэмы органаў пракуратуры і скарачэнне штатнай колькасці, — зазначаецца ў паведамленні прэс-службы. — Прыняцце ўказа дазволіць зменшыць асігнаванні, што выдзяляюцца з рэспубліканскага бюджэту на ўтрыманне органаў пракуратуры, у 2014 годзе на 312 млн рублёў, у наступныя гады — на 2,2 млрд штогод».
