У Францыі з падачы вядомага акцёра пачалася хваля MeTooХлопцы
Сведчанні пра перажыты сэксуальны гвалт мужчыны публікуюць на сваіх старонках у сацыяльных сетках. Іх выпадкі маюць значныя адрозненні ад выпадкаў з жанчынамі і ўздымаюць важную праблему, якая існуе ў грамадстве.
Ілюстрацыйнае фота
Як піша Le Monde, хэштэг #metoogarcons быў запушчаны 22 лютага акцёрам Аўрыленам Вікам (Aurélien Wiik), які ва ўзросце ад 11 да 15 гадоў сам быў ахвярай гвалту з боку свайго агента і людзей з ягонага атачэння.
Хэштэг хутка распаўсюдзіўся, і цяпер сацыяльныя сеткі напоўненыя сведчаннямі мужчын усіх узростаў аб тым, як яны сталі ахвярамі сэксуальнага гвалту, жорсткага абыходжання ў дзяцінстве або падлеткавым узросце з боку людзей з іх асяроддзя, радзей — з боку незнаёмцаў.
Выданне цытуе некаторыя запісы: «Калі мне было 11, мой старэйшы брат папрасіў мяне заняцца з ім аральным сэксам»; «Я стаў ахвярай сэксуальных дотыкаў з боку стрыечнага брата, якога бачыў кожнае лета»; «Сямейны доктар дакранаўся да мяне, калі мне было 16»; «З 9 да 15 гадоў я падвяргаўся гвалту з боку айчыма».
Па даных Міністэрства ўнутраных спраў Францыі, у 2022 годзе ў 13% усіх зарэгістраваных выпадкаў сэксуальнага гвалту ахвярамі былі мужчыны. Але, у адрозненне ад жанчын, якія церпяць ад гэтага на працягу ўсяго жыцця, у выпадку мужчын сітуацыя выглядае інакш.
Як паказала апытанне, праведзенае ў 2015 годзе сярод 27 тысяч мужчын і жанчын ва ўзросце ад 20 да 69 гадоў, 80% мужчын сталі ахвярамі ва ўзросце да 18 гадоў. Пра тое, што зазнавалі сэксуальны гвалт на працягу ўсяго жыцця, паведамілі 3,9% мужчын і 14,5% жанчын.
Дактарант Школы перспектыўных даследаванняў у галіне сацыяльных навук і Нацыянальнага інстытута дэмаграфічных даследаванняў Люсі Вікі (Lucie Wicky) у інтэрв'ю выданню адзначыла, што 90% выпадкаў гвалту ў адносінах да мужчын таксама здзяйсняюць іншыя мужчыны, і гэта не заўсёды дарослыя. Існуе мноства сведчанняў аб злоўжываннях, здзейсненых іншымі непаўналетнімі, якія старэйшыя за ахвяр.
Гэтая асаблівасць характэрная для хлопчыкаў, у той час як дзяўчынкі часцей падвяргаюцца нападам з боку дарослых мужчын. Па словах Вікі, агрэсары выкарыстоўваюць свае намеры пад маркай гульняў і далучэння да сэксуальнага жыцця.
Калі да 12-гадовага ўзросту сэксуальны гвалт, якому падвяргаюцца хлопчыкі, у пераважнай большасці выпадкаў здзяйсняецца кімсьці з сямʼі ці блізкага атачэння, то пасля гэтага ўзросту ён адбываецца ў «іншых прасторах зносін — у школе ці інтэрнаце, падчас заняткаў спортам ці правядзення вольнага часу». Сэксуальны гвалт, якому падвяргаюцца падлеткі, таксама часам зʼяўляецца часткай прыніжэнняў у школе.
Таксама шмат сведчанняў пра сэксуальны гвалт, які зазналі падлеткі падчас першых гомасэксуальных адносін. На думку Люсі Вікі, «калі гетэрасэксуальныя мужчыны часта ўступаюць у сэксуальныя адносіны з маладзейшымі жанчынамі, то ў геяў усё наадварот. Іх ініцыююць старэйшыя мужчыны, і часам ім цяжка сказаць «не».
У сваіх апавяданнях ахвяры гвалту таксама вельмі часта адзначаюць, што калі яны казалі пра здарэнне, ім не верылі ні навакольныя, ні паліцыя. Па словах антраполага і актывіста па абароне дзяцей Арно Гале (Arnaud Gallais), які сам у дзяцінстве быў ахвярай інцэсту,
«мы жывем у грамадстве, дзе гаворым сабе, што хлопчык не можа быць ахвярай. Мы мяркуем, што ён заўсёды зможа абараніцца».
Спецыялісты адзначаюць значныя цяжкасці ў распазнанні сэксуальнага гвалту. У грамадстве існуе практыка замоўчвання такіх фактаў. Дзеці незалежна ад полу застаюцца недастаткова пачутымі, іх словы не ўспрымаюцца ўсурʼёз.
Чытайце яшчэ:
Гэтая выстава даказвае, што вопратка і сэксуальны гвалт ніяк не звязаныя ФОТЫ
«Вульгарнасць і гвалт». У ЗША прымаюць Біблію са школ
У Брытаніі дзяўчыну асудзілі на сем гадоў за хатні гвалт з бойфрэнда
