У Новай Зеландыі расследуюць таямнічае знікненне 500 кароў
Паліцыя Новай Зеландыі расследуе знікненне 500 кароў з фермы на Паўднёвым востраве. Мясцовыя жыхары кажуць, што ніколі раней не сутыкаліся з такім масавым згонам жывёлы.
Знікненне было выяўлена пры пераліку кароў. Пры папярэднім падліку ў пачатку ліпеня на ферме налічвалася 1300 кароў. Паліцыя мяркуе, што крадзеж ажыццяўляўся паэтапна на працягу гэтых двух месяцаў.
Уладальнік фермы не дае каментароў з нагоды інцыдэнту. Па папярэдніх падліках, яго страты могуць скласці да 750 тысяч даляраў.
Мясцовыя ўлады парэкамендавалі фермерам надзейна ўмацоўваць межы сваіх уладанняў і рэгулярна пералічваць жывёлу, каб пазбегнуць маштабных крадзяжоў.
У Новай Зеландыі налічваецца каля 10 мільёнаў кароў - амаль удвая больш, чым жыхароў краіны. Кошт адной каровы складае каля 1000 даляраў.
Фермеры адзначаюць, што ў кожнай каровы на вуху маецца электронная бірка з нумарам, якую можна зняць пасля крадзяжу, аднак прадаць карову без біркі будзе няпроста.
