Расійскі «Мемарыял» абвінавацілі ў падрыве канстытуцыйнага ладу РФ
Мінюст РФ абвінаваціў Міжрэгіянальную грамадскую арганізацыю «Праваабарончы цэнтр «Мемарыял» у спробах падарваць «асновы канстытуцыйнага ладу РФ, заклікаючы да звяржэння дзейнай улады і змены палітычнага рэжыму ў краіне».
Пра гэта піша газета «Коммерсант».
Выданне прыводзіць цытаты з акта планавай праверкі, якую правяло галоўнае ўпраўленне Мінюста. У дакуменце гаворыцца, што на сайце арганізацыі выяўленыя сведчанні таго, што «арганізацыя актыўна займаецца палітычнай дзейнасцю з мэтай фармавання негатыўнай грамадскай думкі па дзяржпалітыцы, якая праводзіцца вышэйшымі органамі дзяржаўнай улады, выказвае нязгоду з рашэннямі і дзеяннямі названых інстытутаў улады, вынікамі папярэдняга следства і судовымі прысудамі па рэзанансных крымінальных справах».
У якасці прыкладу чыноўнікі Мінюста прыводзяць апублікаваную ў жніўні мінулага года цытату з заявы «Мемарыялу» аб тым, што «дзеянні Расеі супраць Украіны падпадаюць пад вызначэнне агрэсіі», і навінавае паведамленне, апублікаванае ў лютым таго ж года, з думкай «аб нязгодзе з прысудам, вынесеным Замаскварэцкім раённым судом горада Масквы па так званай «балотнай справе».
«На думку членаў «Мемарыялу», следчыя і суддзі сфабрыкавалі дадзеную справу, здзейсніўшы злачынства супраць правасуддзя», — гаворыцца ў дакуменце.
Аўтары акта ўпэўненыя, што нязгода з прысудам па справе аб «масавых беспарадках» азначае, што сябры НКА «падрывалі асновы канстытуцыйнага ладу РФ, заклікаючы да звяржэння дзейнай улады, змены палітычнага рэжыму ў краіне».
У Мінюсце наступствы такой высновы пракаментаваць не змаглі. У самой арганізацыі газеце заявілі, што чакаюць, напрыклад, адміністрацыйнага пратакола, пазова аб ліквідацыі або зварот у Следчы камітэт для распачынання крымінальнай справы.
Член рады «Мемарыялу» Алег Арлоў падкрэсліў, што гэта была першая планавая праверка арганізацыі пасля яе ўнясення ў рэестр замежных агентаў і першае «чыста палітычнае абвінавачванне».
