COVID-19 uspychnuŭ u domie sastarełych u Kobrynskim rajonie
Karanavirus vyjaŭleny ŭ 26 z 39 žycharoŭ Doma miłasernaści ŭ vioscy Imianin Kobrynskaha rajona Bresckaj vobłaści.
Pra heta paviedamlaje miascovy sajt prosvit.org.
«Vielmi patrebna dapamoha ŭ Domie miłasernaści ŭ Kobrynie, Bresckaja vobłaść, Biełaruś. Heta chryścijanski dom-internat dla pažyłych ludziej i ludziej ź invalidnaściu, jaki, jak i mnohija damy sastarełych, byŭ achopleny chvalaj novaha nieviadomaha virusa. Karanavirus dyjahnastavali ŭ bolš za pałovu žycharoŭ i mnohich supracoŭnikaŭ, i mocna nie chapaje absłuhovaha piersanału. Ciapier niešmatlikija rabotniki, jakija zastalisia z admoŭnym testam na COVID-19, pracujuć vachtavym mietadam i žyvuć z žycharami. Takaja izalacyja — heta vialikaje vyprabavańnie dla piersanału», — takoje paviedamleńnie źjaviłasia na staroncy abjekta sacyjalnaha dohladu «Dom miłasernaści», raźmieščanaj na bazie ŭstanovy dziciačy azdaraŭlenčy centr «Piarlinka» ŭ vioscy Imianin Kobrynskaha rajona.
U 1997 hodzie ŭ abmien na budaŭnictva žylla dla 18 aficerskich siamiej były vajskovy haradok byŭ pieradadzieny chryścijanskaj dabračynnaj misii «Emanuił» jevanhielskich chryścijan-baptystaŭ. Na jaje terytoryi byŭ spačatku stvorany chryścijanski dziciačy centr, dzie ŭ svaju čarhu ŭ 2010 hodzie adkryty Dom miłasernaści.
Stanoŭčy karanavirusny status paćvierdziŭsia jak minimum u 26 z 39 žycharoŭ Doma miłasernaści. Usie pastajalcy izalavanyja, pražyvajuć u pakojach pa adnym.
Zarazilisia i vosiem supracoŭnikaŭ Doma miłasernaści. Siarod ich — i zahadčyk Ihar Miklajeŭ. Usie lečacca ambułatorna.
U niekatorych krainach Zachodniaj Jeŭropy, naprykład Francyi, dzie vialikaja dola starych žyvie ŭ damach sastarełych, žychary takich ustanoŭ składajuć da traciny achviar pandemii.
Raniej prychodzili tryvožnyja viestki pra situacyju ŭ damach sastarełych u Śviry (Miadzielski rajon), Kuli (Staŭpiecki rajon), inšych rajonach.
