U Staŭbcoŭskim domie sastarełych — COVID-19. Rabotniki bjuć tryvohu pra chvorych kaleh i pacyjentaŭ
U Staŭbcoŭskim psichanieŭrałahičnym domie-internacie dla starych i ludziej ź invalidnaściu — uspyška karanavirusa. Pra heta TUT.BY paviedamili supracoŭniki internata. Pa ich słovach, chvarejuć jak tyja, chto tam žyvie, tak i miedycynskija rabotniki. Aficyjnaha paćvierdžańnia hetaj infarmacyi niama.
Staŭbcoŭski psichanieŭrałahičny dom-internat dla sastarełych i ludziej ź invalidnaściu znachodzicca ŭ vioscy Kul, za 45 kiłamietraŭ ad rajonnaha centra. U internacie pražyvaje prykładna 500 čałaviek i pracuje kala 300 supracoŭnikaŭ — jak miascovyja žychary, tak i rabotniki ź Ivianca i Vałožyna.
Sa słoŭ troch miedycynskich rabotnikaŭ, ź jakimi na ŭmovach ananimnaści ŭdałosia pahavaryć TUT.BY, pražyvajučyja pačali chvareć u kancy sakavika.
— Naš internat — heta piacipaviarchovy budynak z doŭhimi kalidorami. Na kožnym paviersie pražyvaje pa 100 čałaviek, u adnym pakoi moža być pa čatyry-šeść čałaviek. U kancy sakavika ŭ mnohich pačała padymacca tempieratura. U hety ž čas stali chvareć miedsiostry i sanitary, jakija pracavali bieź jakich-niebudź achoŭnych srodkaŭ — masak i palčatak, nie kažučy ŭžo ab śpiecyjalnych kaściumach. Na 100 čałaviek u nas šeść rtutnych termomietraŭ, jakimi my mierajem tempieraturu. Adna miedsiastra mahła zrabić da 70 ukołaŭ. Možacie ŭjavić, u jakim kantakcie byli ludzi, jakija tut pražyvajuć, i miedrabotniki.
U 10-ch čysłach krasavika, raspaviadaje adna ź miedrabotnic, u Staŭbcoŭskuju CRB špitalizavali čaćviora pražyvajučych z vysokaj tempieraturaj i padazreńniami na pnieŭmaniju. Paźniej u adnaho ź ich paćvierdziŭsia karanavirus.
— Paśla hetaha tych, chto zachvareŭ, adsialili ŭ asobny žyły korpus, raźličany na 70 čałaviek.
Aficyjnaja infarmacyja pra toje, kolki vypadkaŭ zaražeńnia vyjaŭlena ŭ žylcoŭ internata, jość tolki ŭ kiraŭnictva, kaža adzin z surazmoŭcaŭ TUT.BY. Toje ž samaje tyčycca i infarmacyi pra supracoŭnikaŭ — miedsiostraŭ i sanitarak. Pa ich ułasnych padlikach, ciapier na balničnych listach z prykmietami karanavirusnaj infiekcyi i ŭ samaizalacyi znachodzicca bolš 10 čałaviek. Chtości — ź simptomami VRVI i strataj niuchu, u niekatorych vyjaŭlenyja pnieŭmanii. Minimum u šaści miedsiaścior test na karanavirus daŭ stanoŭčy vynik.
— Mnohija z tych, chto znachodzicca ciapier na balničnym abo ŭ adpačynku, bajacca vychodzić na pracu. Da hetaha času ŭ nas u internacie niama padziełu na brudnuju i čystuju zonu. Da niadaŭniaha času nie chapała srodkaŭ abarony. Choć ciapier z hetym stała lepš.
Častka supracoŭnikaŭ internata pražyvaje ŭ vioscy Kul. Inšyja pryjazdžajuć z Vałožyna i Ivianca.
Dyrektar Staŭbcoŭskaha psichanieŭrałahičnaha doma-internata dla sastarełych i ludziej ź invalidnaściu Juryj Kałasoŭski ad kamientaroŭ admoviŭsia, paraiŭšy źviartacca pa aficyjnuju infarmacyju ŭ Ministerstva pracy i sacyjalnaj abarony abo ŭ Ministerstva achovy zdaroŭja.
Na sajcie internata ciapier možna znajści nastupnuju infarmacyju: kab papiaredzić niedachop srodkaŭ abarony, dezynfikujučych i antysieptyčnych srodkaŭ, miedycynskich palčatak, dom-internat prymaje biazvypłatnuju sponsarskuju dapamohu. Kali vy chočacie dapamahčy, źviazvacca treba niepasredna z dyrektaram.
Datelefanavacca da načalnika ŭpraŭleńnia pa pracy, zaniataści i sacyjalnaj abaronie Staŭbcoŭskaha rajvykankama nie ŭdałosia.
TUT.BY źviarnuŭsia ŭ Ministerstva pracy i sacyjalnaj abarony z prośbaj paćvierdzić abo abvierhnuć infarmacyju pra vypadki zachvorvańnia na COVID-19 u Staŭbcoŭskim psichanieŭrałahičnym internacie, a taksama raskazać pra miery, jakija robiacca, kab nie dapuścić raspaŭsiudžvańnia karanavirusa ŭ padobnych ustanovach. Dać hetuju infarmacyju žurnalistam nie zmahli, pieraadrasavaŭšy ŭ Ministerstva achovy zdaroŭja. Tam atrymać apieratyŭny kamientar nie ŭdałosia.
Ludzi, jakija pražyvajuć u damach-internatach dla sastarełych i ludziej ź invalidnaściu, — u hrupie ryzyki. Na płatformie MolaMola inicyjatyva COVID-19PNI źbiraje hrošy, za jakija kuplaje i razvozić pa roznych ustanovach srodki abarony dla miedrabotnikaŭ. Heta achoŭnyja kaściumy, maski, antysieptyki, dezynfikujučyja srodki i inšaje.
Inicyjatarami zboru srodkaŭ i adkaznymi za ich efiektyŭnaje vykarystańnie vystupajuć «Ofis pa pravach ludziej ź invalidnaściu» i dabračynnaja ŭstanova «Jość sprava».
