«Mahło pieraraści ŭ Treciuju suśvietnuju»: Łukašenka vyrašyŭ asabista razabracca ŭ pytańniach draždžavoj haliny
Pytańni funkcyjanavańnia pradpryjemstvaŭ draždžavoj haliny byli abmierkavanyja siońnia na naradzie ŭ Alaksandra Łukašenki, pieradaje BIEŁTA.
U apošni raz situacyja ŭ draždžavoj halinie na ŭzroŭni kiraŭnika dziaržavy abmiarkoŭvałasia u 2018 hodzie — u lutym Alaksandr Łukašenka naviedaŭ Słucki draždžavy zavod, u śniežni razmova pra jaho zajšła ŭžo na naradzie z kiraŭnictvam Savieta ministraŭ, dzie razhladałasia rabota dziaržaŭnych pradpryjemstvaŭ.
«Siońnia my razhledzim adno z pytańniaŭ, jakoje, na žal, davodzicca vynosić na ŭzrovień prezidenta, ale jakoje pavinna było być daŭno vyrašana va ŭradzie», — Alaksandr Łukašenka pačaŭ naradu z zaŭvahi Saŭminu.
Za minuły čas draždžavy zavod u Słucku, u jaki było ŭkładziena kala 37 młn ieŭra, u tym liku 10 młn jeŭra hiermanskich inviestycyj, naraściŭ svaje vytvorčyja mahutnaści. Ciapier jany składajuć 20 tys. t pradukcyi ŭ hod. Mahutnaści zavoda dazvalajuć naraścić vytvorčaść da 70 tys. t. Akramia taho, u krainie pracujuć draždžavy kambinat u Minsku i jaho filijał u Ašmianach. Jany mohuć štohod vyrablać 15,1 tys. t pradukcyi. Jomistaść ž biełaruskaha rynku presavanych droždžaŭ składaje 7,7 tys. Tt.
«Jak mnie dakładvajuć, patrebnaść unutranaha rynku respubliki ŭ presavanych draždžach poŭnaściu zabiaśpiečana za košt ajčynnaj vytvorčaści. Naša draždžavaja pradukcyja taksama pastaŭlajecca na ekspart, u tym liku ŭ krainy Jeŭrapiejskaha sajuza», — adznačyŭ jon.
Adnak u hetaj śfiery, ličyć kiraŭnik dziaržavy, da hetaha času jość niezadziejničanyja reziervy rostu. Akramia tradycyjnaha chlebapiačeńnia droždžy mohuć prymianiacca i ŭ miedycynie, i ŭ žyviołahadoŭli, zaŭvažyŭ Alaksandr Łukašenka. «Chaciełasia b siońnia abmierkavać pytańni efiektyŭnaści draždžavoj haliny i napramki jaje dalejšaha raźvićcia», — dadaŭ jon.
Pry hetym Łukašenka, kab nie było «ŭsiakaha rodu kanśpirałohii», nie staŭ utojvać isnujučyja niuansy, jakija i źjaŭlajucca padstavaj dla praviadzieńnia narady.
«Siońnia niemcy nibyta patrabujuć, kab my začynili ŭsie našy vytvorčaści draždžavoj haliny i pakinuli adno pradpryjemstva dla pracy na biełaruskim rynku. Prykładna takoje patrabavańnie. I nibyta jano zasnavana na tym, što my abiacali heta zrabić da taho, jak byŭ pabudavany ŭ Słucku novy draždžavy zavod, - rastłumačyŭ kiraŭnik dziaržavy.
— I mianie taksama ŭ hetym pierakonvali i členy ŭrada, i premjer-ministr, što my abiacali, i kali my heta nie zrobim, to zaŭtra pačniecca vajna z Hiermanijaj, jakaja moža pieraraści ŭ Treciuju suśvietnuju».
Pierad naradaj damova ź inviestarami była praanalizavana ŭ Administracyi prezidenta. Akazałasia, što ŭ dakumiencie nie ŭtrymlivałasia adpaviednych patrabavańniaŭ i pałažeńniaŭ. Pavodle słoŭ Alaksandra Łukašenki, takoha i być nie mahło. «A kali było — to heta duraść poŭnaja z boku našych čynoŭnikaŭ, — zajaviŭ jon. — Tym nie mienš davajcie ŭ hetym raźbiaremsia. Kali my niešta abiacali, asabliva zamiežnym inviestaram, heta śviata pavinna vykonvacca. Kali nie, to ŭ takoj situacyi davajcie znojdziem narmalny vychad sa stanovišča, bo heta dva našyja pradpryjemstvy, nie važna, chto tudy inviestavaŭ — niemcy, biełarusy, ruskija ci ŭkraincy. heta ŭžo našy pradpryjemstvy, i my pavinny turbavacca ab ich funkcyjanavańni. Ale nie pra adno za košt inšaha. i hałoŭnaje — heta ludzi, jakija pracujuć i tam, i tut. U pieravažnaj bolšaści heta biełarusy».
