Błohier Niechta: Da akcyi 15 listapada ja nie maju dačynieńnia. Nie budu zaklikać ludziej iści tudy
8 listapada na płoščy Svabody ŭ Minsku adbyłasia vuličnaja akcyja, jakuju inicyjavaŭ błohier Niechta (Ściapan Puciła). Padčas jaje aktyvist «Jeŭrapiejskaj Biełarusi» Jaŭhien Afnahiel paviedamiŭ, što nastupny vuličny pratest zapłanavany na 15 listapada.
«Naša Niva» źviarnułasia pa kamientar da Ściapana Puciły, kab jon vykazaŭ svaju pazicyju adnosna hetaj inicyjatyvy.
«Naša Niva»: Z vami ŭzhadniałasia rašeńnie ab čarhovym sklikańni ludziej na płošču?
Ściapan Puciła: Da zakliku na 15 listapada ja nie maju dačynieńnia, a taksama nie razumieju kanśpirałahičnych teoryj na hetuju temu. Sa mnoj heta nie ŭzhadniałasia, heta była ŭłasnaja inicyjatyva niekalkich udzielnikaŭ «schodki» 8 listapada, jany majuć na hetyja zakliki poŭnaje prava. Ja padtrymlivaju luby «dźviž», ale liču, što ŭsio ž nie treba złoŭžyvać pieradvybarčaj «libieralizacyjaj» — hetak my tolki jašče bolš lehitymizujem łukašenkaŭskaje šou ŭ vačach hramadstva i Zachadu.
Tak, ja byŭ nie suprać vykarystać vybarčaje zakanadaŭstva, kab pravieści sustreču svaich padpisantaŭ 8 listapada. Ale ź pieradvybarčaj ahitacyjaj heta nie mieła ničoha ahulnaha. I ja vielmi ŭdziačny kandydatam u deputaty, jakija dazvolili farmalna dałučycca da ich pikietu na płoščy Svabody. Heta było nieabchodna dla biaśpieki ŭdzielnikaŭ majho mierapryjemstva:
ja nikoli i ni pry jakich umovach nie budu nakiroŭvać svaich ludziej pad dubinki AMAPu, nie papiaredžvajučy pra mahčymuju pahrozu.
8 listapada ŭsio prajšło, jak vy viedajecie, amal biez zatrymańniaŭ i hvałtu. Taksama ja vielmi ŭdziačny suarhanizataram, jakija ryzykavali svabodaj i ŭłasnaj majomaściu dziela taho, kab akcyja adbyłasia.
Akcyju 15 listapada ja padtrymlivaju, ale nie maju prava zaklikać svaich ludziej na jaje. Tamu što heta nie maja tusa. Šmat ruchaŭ, inicyjatyvaŭ, partyjaŭ prosić anansavać niejkaje mierapryjemstva abo dapamahčy im ŭ prasoŭvańni niejkaj infarmacyi, pietycyjaŭ, zaklikaŭ. Ale kali ja anansuju adno, ale nie anansuju inšaha, to ŭźniknuć pytańni.
Tamu ja starajusia maksimalna dystansavacca ad niejkich zaklikaŭ dapamahčy, prasunuć, padtrymać publična. Ja błohier, a nie palityk. Ja nie chaču potym uviazvacca ŭ sprečki, dyskusii, razvahi.
«NN»: Jak vy staviciesia, što pry hetym sprabujuć prykrycca vašym imieniem i vašym filmam?
SP: Pakul nie zaŭvažaŭ takoha. Heta dobra, što film idzie ŭ narod, što jaho abmiarkoŭvajuć, ładziać sustrečy. Ja tolki «za». Luby pijar čahości stanoŭčaha, pravilnaha — heta dobra.
«NN»: Dziela čaho na płoščy Svabody prahučaŭ zaklik znoŭ sabracca 15 listapada?
SP: Hetaje pytańnie treba zadać tym, chto vystupiŭ z takim zaklikam.
«NN»: Jak vy budziecie reahavać na hetuju akcyju?
SP: Jak i na ŭsie łukašenkaŭskija psieŭdavybary ŭ psieŭdaparłamient — nijak. Adpaviedna, i zaklikaŭ z majho boku nie budzie nijakich. A ŭ ludziej jość poŭnaje prava chadzić ci nie chadzić tudy, kudy jany ličać patrebnym. Ja nie maju prava im niešta zahadvać.
