Padčas vyvazu Cemacha z Daniecka zahinuŭ ukrainski raźviedčyk, jašče adzin straciŭ nahu
Raźviedčyk Alaksandr Kałodziežny, jaki zahinuŭ padčas vyvazu Cemacha.
U apieracyi pa vyvazie fihuranta spravy ab źbićci MN17 Uładzimira Cemacha z akupavanaha Daniecka, akramia śpiecsłužbaŭ, udzielničali bajcy 74-ha asobnaha raźviedbata VSU. U vyniku adzin z raźviedčykaŭ zahinuŭ, druhi — straciŭ nahu, piša ŭkrainskaja słužba radyjo «Svaboda».
Pa słovach udzielnika apieracyi, jaki kazaŭ na ŭmovach ananimnaści, padčas vyvazu Cemacha 27 červienia byŭ śmiarotna paranieny siaržant 74 ARB Alaksandr Kałodziežny. Jon pamior 11 lipienia ŭ vajennym špitali ŭ Kijevie, nie prychodziačy ŭ prytomnaść.
Aficyjna z apieracyi pa vyvazie Cemacha da hetaha času nie źniali hryf sakretnaści.
«Z našaha boku padrychtoŭka da apieracyi zaniała litaralna sutki. Inšyja słužby, viadoma, rychtavalisia da jaje daŭžej, ale detali my, jak zaŭsiody, naŭmysna nie raspytvali. Kali niešta pojdzie nie tak — lepš viedać mienš, — raspavioŭ udzielnik apieracyi. —
Našaj zadačaj była, ułasna, pieravozka Cemacha cieraź liniju raźmiežavańnia. Składanaść tut, u pryvatnaści, była ŭ tym, što na peŭnym učastku pad Danieckam vorah stajaŭ davoli kučna: jaho ahniavyja pazicyi mahli znachodzicca litaralna za 100 mietraŭ adna ad adnoj. U tak zvanaj «DNR» da hetaha času nie viedajuć, u jaki mienavita prabieł my zaleźli, kab vyvieźci Uładzimira Cemacha.
… Učastak, na jakim ruchalisia chłopcy z majho padraździaleńnia, z taho boku kantralavała tak zvanaja sotyja bryhada «hvardyi» «DNR». Z pačatku vajny my pracavali ŭ mnohich miescach Danbasa, i tamu ja ŭpeŭniena mahu skazać: tolki jany, hetaja «sotaja bryhada», vystavili vakoł siabie tak šmat zabaronienych Ženieŭskaj kanviencyjaj supraćpiachotnych min (PMN). Inšyja padraździaleńni bajevikoŭ taksama vykarystoŭvajuć PMN, ale «sotka» — bolš za ŭsio.
Kab vyvieźci Cemacha, siaržantu Alaksandru Kałodziežnamu i jašče adnamu našamu bajcu faktyčna daviałosia iści pa minnym poli. Chłopcy spuskalisia praz pahorak, Saša źjazdžaŭ na ściahnie i «sarvaŭ» PMN. Druhi bajec padbieh, kab akazać jamu dapamohu, i sam taksama padarvaŭsia.
Mina spracavała adnačasova kala Sašavaj hałavy i nahi druhoha bajca.
Urešcie Sašu vyvozili nieprytomnym, a druhi bajec straciŭ nahu», — raspavioŭ udzielnik apieracyi.
Da hibieli Kałodziežny mieŭ jašče try ranieńni. Svaju pieršuju kantuziju jon atrymaŭ uvosień 2014 pry abaronie Danieckaha aeraporta.
Druhoje ranieńnie było ŭ 2015 hodzie ŭ rajonie Krutoj Bałki, kali hrupa raźviedčykaŭ padarvałasia na raściažcy. Dvoje ź ich tady zahinuli, jašče troje, u tym liku Alaksandr, atrymali ranieńni.
Svajo treciaje, samaje surjoznaje ranieńnie Kałodziežny atrymaŭ padčas abarony Aŭdziejeŭskaj pramzony ŭ 2016 hodzie. Tady jon trapiŭ u zasadu i byŭ paranieny z kulamiota ŭ ściahno. Paśla hetaha amal hod pravioŭ u špitalach, chadziŭ z kulbaj, ale paśla adnaviŭsia.
Były bajavik «DNR» Uładzimir Cemach ličycca kaštoŭnym śviedkam pa spravie ab hibieli na Danbasie małajzijskaha «Boinha» rejsa MH17.
Śledčyja prakuratury Niderłandaŭ dapytali jaho va Ukrainie, pierš čym jon źjechaŭ u Maskvu ŭ ramkach abmienu viaźniami z Rasijaj.
