Padčas Jeŭrapiejskich hulniaŭ buduć błakavać sajty z zaklikam pryjści na niesankcyjanavany mitynh
Alaksandr Łukašenka padpisaŭ ukaz ab mierach biaśpieki ŭ pieryjad praviadzieńnia Jeŭrapiejskich hulniaŭ u Minsku — z 17 červienia pa 2 lipienia. Zhodna z dakumientam, achovie ŭ haścinicach dazvolać pravodzić asabisty nadhlad turystaŭ, pravaachoŭnyja orhany na praciahu sutak buduć błakavać sajty z zaklikami da niesankcyjanavanych mitynhaŭ. Jakija jašče miery ŭtrymlivaje ŭkaz, zadajecca pytańniem Tut.by
Pieršaje — zabaroniena vykarystoŭvać bieśpiłotnyja latalnyja aparaty i avijamadeli na spartyŭnych abjektach i pobač z haścinicami. U tych, chto nie pasłuchajecca, techniku vyklučać da kanca Hulniaŭ. Vyklučeńnie — dziaržaŭnaja technika i technika arhanizataraŭ Jeŭrapiejskich hulniaŭ.
Druhoje — na darohach vydzielać śpiecyjalnyja pałosy ź simvolikaj Hulniaŭ dla ruchu transpartu, zadziejničanaha ŭ praviadzieńni mierapryjemstva. Inšy transpart nie maje prava ruchacca pa takich pałosach i spyniacca na ich — aštrafujuć.
Treciaje — supracoŭniki MNS mohuć pravodzić pazapłanavyja pravierki pa pažarnaj biaśpiecy na spartyŭnych abjektach, u haścinicach, fan-zonach.
Čaćviortaje — na achovu hramadskaha paradku pryciahnuć vajennasłužačych, jakija ŭ vypadku nieabchodnaści zmohuć prymianiać fizičnuju siłu, śpiecsrodki i zbroju. Kursantaŭ mohuć pryciahvać dla akazańnia infarmacyjnaj i arhanizacyjnaj dapamohi zaŭziataram.
Piataje — u haścinicach achova zmoža pravodzić asabisty nadhlad udzielnikaŭ Jeŭrapiejskich hulniaŭ, praviarać ich rečy i dakumienty.
Šostaje — z 20 maja pa 30 červienia pravaachoŭnyja orhany na praciahu sutak buduć błakavać infarmacyju ŭ internecie z zaklikami da masavych biesparadkaŭ ci ŭdziele ŭ masavych mierapryjemstvach, jakija pravodziacca z parušeńniem zakanadaŭstva. Akramia taho, moža być pryniata rašeńnie ab časovym abmiežavańni dostupu da peŭnych sajtaŭ.
