Hubarevič i Kazłoŭ rastłumačyli, čamu zastupilisia za «Biełsat» i što dumajuć pra situacyju z Šyłam
Kiraŭnik Ruchu «Za Svabodu» Juraś Hubarevič, vykanaŭca abaviazkaŭ staršyni AHP Mikałaj Kazłoŭ, sustaršynia niezarehistravanaj BCHD Vital Rymašeŭski, a taksama lidar prafsajuza REP Hienadź Fiadynič vystupili z sumiesnaj zajavaj u padtrymku «Biełsata». Hetkim čynam jany vyrašyli adkazać «na kampaniju ŭ sacyjalnych sietkach suprać telekanała».
«Zaklikaju ŭsie niezaležnyja palityčnyja struktury i hramadskija arhanizacyi Biełarusi, usich nieabyjakavych hramadzian krainy padtrymać Biełsat i abaranić jaho ad napadak», — adznačyŭ Rymašeŭski.
My spytali ŭ Jurasia Hubareviča i Mikałaja Kazłova, čym jany kiravalisia, kali padpisvali hetu zajavu.
Juraś Hubarevič.
«Biełsat» — heta adzinaja krynica atrymańnia niezaležnaj infarmacyi ŭ televizijnym farmacie. Telebačańnie pa-raniejšamu maje vialiki ŭpłyŭ na hramadzian našaj krainy. A «Biełsat» vystupaŭ tut nie tolki suprać biełaruskaj prapahandy, ale i prasoŭvańnia «ruskaha śvietu». Šumicha vakoł telekanała nie niasie nijakaj karyści. Jana ŭźnikła absalutna na pustym miescy.
My nazirajem spłanavanuju akcyju pa dyskredytacyi «Biełsata», a de-fakta pa jaho źniščeńni. Kali «Biełsat» zakryjuć, to nikomu karyści ad hetaha nie budzie», — skazaŭ Hubarevič.
My ŭdakładnili ŭ palityka, chto ž tady spłanavaŭ hetuju akcyju suprać «Biełsata»?
«Mnie ciažka kazać, kim heta moža być arhanizavana. Ale my bačym, što ŭ sacyjalnych sietkach uźnikajuć usio novyja i novyja dopisy. Šmat chto z hetych ludziej užo navat zabyŭsia, z čaho ŭsio pačynałasia».
Vykanaŭca abaviazkaŭ staršyni AHP Mikałaj Kazłoŭ skazaŭ, što situacyja ź Ivanam Šyłam «sprečnaja», jon jaje kamientavać nie chacieŭ by. «Biełsat» sam raźbiarecca», — upeŭnieny palityk.
Mikałaj Kazłoŭ. Fota svaboda.org.
«Padtrymać telekanał — nie majo rašeńnie, a palitrady. «Biełsat» — heta važnaja krynica infarmacyi ŭ telefarmacie. Ja viedaju, jak u tym ža Niaśvižy źbirajucca razam piensijaniery i intelihiencyja, kab pahladzieć «Biełsat». Kali telekanał zahinie, to heta stvoryć vakuum, jaki chutka zapoŭnić «ruski śviet» i dziaržaŭnaja prapahanda», — adznačyŭ Mikałaj Kazłoŭ.
