U Mahilovie dzieci vyjšli na akcyju pratestu, bo treniera zabrali ŭ vojska FOTA
U Mahilovie hadavancy dziciača-junackaj spartovaj škoły № 1, jakija zajmajucca tenisam, zastalisia biaz trenera. Jaho zabrali ŭ vojska. Junyja spartoŭcy, kab pryciahnuć uvahu da taho, što vučyć ich tenisu niama kamu, adreahavali fłešmobam. Fatazdymki ź jaho raźmiaścili ŭ sacyjalnych sietkach, piša Radyjo Svaboda.
Kiraŭnictva DIUSŠ № 1, u jakim pracuje trener-pryzyŭnik, zajaŭlaje: u Mahiloŭ specyjalisty ŭ tenisie nia jeduć, bo niama krytych kortaŭ. Zabranaha ŭ sałdaty trenera Kanstancina Ćviatkova sprabujuć viarnuć.
Baćki junych tenisistaŭ u razhublenaści
Na pratest advažylisia 13 dzietak. Kožny trymaŭ arkuš papiery z nadpisam «Viarnicie trenera!». Jak śćviardžajuć baćki, vykazać hetkim čynam svajo staŭleńnie da prablemy dzieci dadumalisia sami. Ich aburyła, što trenera zabrali ŭ vojska pierad samym lahieram. Pavodle baćkoŭ, pieršyja ŭ letniku trenavańni ź junymi tenisistami pravodzili specyjalisty ŭ ciažkaj atletycy i nastolnym tenisie.
«U nas vypytvali, ci možam my adšukać taho, chto moh by niejak lahier davieści da kanca. Administracyja zakłapočanaja pošukami, abiacaje, što da 1 vieraśnia ŭ nas budzie novy trener. Viadoma ž, nas turbuje, što adździaleńnie tenisu naahuł mohuć u škole likvidavać. Z takoj sytuacyjaj užo sutykalisia i hod nie trenavalisia», — skazaŭ Svabodzie adzin z baćkoŭ.
Baćki nia ŭtojvajuć: pra pahrozu pryzyvu ŭ vojska trenera Kanstancina Ćviatkova viedali, ale spadziavalisia, što jamu dazvolać adsłužyć u rezervie. Ź ich inicyjatyvy kiraŭnictva DIUSŠ № 1 źviarnułasia ŭ vajenkamat, kab Kanstancinu dali adterminoŭku na pieršy letni miesiac. U hety čas, pisała ŭ vajenkamat administracyja škoły, pravodzicca letnik, u jakim ich trener vučyć tenisu 14 dziaciej, «za zdaroŭje i žyćcio jakich jon niasie adnaasobnuju adkaznaść». Heta nie dapamahło.
Pavodle baćkoŭ, Kanstancin — vypusknik Mahiloŭskaj vučelni alimpijskaha rezervu pa specyjalnaści trener tenisu. Pa skančeńni navučalnaj ustanovy jon bolš za hod nia moh znajści sabie zaniatak. Šukała jamu pracu i maci. Paśla taho, jak žančyna napisała ŭ Ministerstva sportu i turyzmu, synu prapanavali trenavać dziaciej u spartovaj škole.
Pracavać chłopiec pačaŭ ź letašniaha vieraśnia. Pavodle baćkoŭ, jon apiekavaŭsia čatyrma dziasiatkami dziaciej ad 6 da 12 hadoŭ. Niekatoryja ź ich zajmajucca tenisam nie adzin hod. Hadavancy ŭpadabali svajho nastaŭnika. Byli zadavolenyja maładym specyjalistam i baćki. Zarobak u Kanstancina niedaciahvaŭ da 400 rubloŭ.
«Za treniroŭki jon hrošy nia braŭ. My z svaje inicyjatyvy nabyli miačy, ubačyŭšy ich stan. Jany duža chutka znošvajucca. Kuplali i inšy ryštunak. Sami damaŭlalisia z administracyjaj siaredniaj škoły, kab uzimku trenavacca ŭ jaje zali. Apłačvali ŭdzieł u spabornictvach. Turnirny ŭniosak — 30-50 rubloŭ. Ciapier sytuacyja niapeŭnaja. My ŭ razhublenaści», — adznačyŭ baćka adnaho ź junych tenisistaŭ Dzianis Okałaŭ.
Zamianić zaniatki ŭ dziaržaŭnaj ustanovie na indyvidualnyja treniroŭki ŭ baćkoŭ niama hrošaj. Pavodle ich, płatnyja pasłuhi ŭ navučańni tenisam dziaciej abychodziacca ad 50 da 200 rubloŭ za miesiac.
Pryznali «ŭchilistam»
Z samim Kanstancinam pahutaryć nie ŭdałosia. Na telefanavańni jon nie adkazvaje.
Jak udałosia vyśvietlić, Kanstancin trapiŭ u śpisy «ŭchilistaŭ». Chłopiec nibyta parušyŭ praviły pryzyvu: nie źjaviŭsia ŭ vajenkamat, jak było paznačana ŭ poźvie. Pa jaho pryjechali ź milicyjaj, i ciapier jon słužyć u Piečach. Letaś u trenera pamierła maci.
Dyrektarka spartovaj škoły: patrebien kryty kort
Dyrektar DIUSŠ № 1 Julija Viarchoŭcava kaža: adździaleńnie tenisu naviedvajuć blizu troch dziasiatkaŭ dziaciej. Kanstancin paśpieŭ papracavać mieniej za hod. U jaho było try hrupy dziaciej. Chacia, adznačyła jana, miełasia być piać, ale sfarmavać ich było niaprosta, bo ŭmovy dla trenirovak, asabliva ŭ zimovy čas, byli nie zusim dobryja. Ź piaćciu hrupami Kanstancin mieŭ by zarobak u 500 rubloŭ.
Kiraŭnica spartškoły paćviardžaje, što źviartałasia ŭ vajenkamat, kab Kanstancinu dali adterminoŭku. Zabrali trenera ŭ vojska, nie paviedamiŭšy pra heta va ŭstanovu, dzie jon pracavaŭ. Pra zakryćcio adździaleńnia tenisu Julija Viarchoŭcava nie skazała.
Prablemu z trenerami jana źviazvaje z adsutnaściu krytaha kortu ŭ Mahilovie.
«My pisali i ŭ Miensk, kab prysłali nam treneraŭ, ale nia chočuć da nas jechać. Niama krytych kortaŭ, — tłumačyć sytuacyju kiraŭnica spartškoły. — Trenavańnie tenisu ŭ spartovych zalach škołaŭ — heta nia sprava. U tenisu pavinien być svoj kryty kort kruhły hod, i my nia musić ad kahości zaležać. Usio ŭpirajecca, adnak, u finansy».
Pavodle dyrektarki, da nastupnaha hodu krytaja placoŭku dla tenisu moža źjavicca ŭ haradzkim fizkulturna-azdaraŭlalnym klubie. «Tady nam budzie krychu lahčej», — zaŭvažyła jana.
Ciapier, kab znajści rekrutavanamu treneru zamienu, viaducca pieramovy z studentkaj 3-ha kursu ŭniversytetu imia Kulašova. Dziaŭčyna zajmajecca tenisam i moža, na dumku dyrektarki, vučyć dziaciej. Joj napačatku davierać zaniatki ŭ letniku.
Hadavancy adździaleńnia tenisu spartškoły nia raz stanavilisia pieramožcami roznych turniraŭ. Siarod pryzioraŭ byli vaśmi, — dziesiaci, — dvanaccacihadovyja spartoŭcy.
Fizkulturna-azdaraŭlalny klub, jaki mahiloŭcam bolš viadomy z nazvaj «Kosmas-kort», znachodzicca na haradzkim uskrajku ŭ Piačerskim lesaparku. Raniej hetaja ŭstanova mieła nadzimany kryty kort. Svoj resurs, adnak, jon vypracavaŭ, i jaho demantavali. Ciapier uzvodziać stacyjanarny manež z tryma kortami ŭ im.
Kiraŭnictva klubu vykazvaje spadzieŭ, što spartovaje zbudavańnie zdaduć da kanca hodu. Budoŭla na kantroli ŭ staršyni harvykankamu Ŭładzimiera Cumarava. Raźličvać, što krytyja korty buduć biaspłatnymi, nie vypadaje.
Uzvodzić ich pačali ŭ 2014 hodzie, ale praz brak srodkaŭ raboty prypynialisia. Ułady raźličvali na sponsarskuju dapamohu. Paŭtara hoda tamu kiraŭnik horadu abviaściŭ uźviadzieńnie tenisnaha manežu «narodnaj budoŭlaj». Ciapier na abjekcie ažyŭleńnie.
Fizkulturna-azdaraŭlalny klub maje niekalki adkrytych tenisnych placovak. Hrupy z achvotnikami navučycca tenisu, pavodle kiraŭnictva, całkam ukamplektavanyja.
Dziciačy abanement dla adkrytaha kortu na paŭtarahadzinnyja zaniatki try razy na tydzień kaštuje amal 90 rubloŭ.