Kiraŭnik Kobryna vydaliŭ prapucinskuju staronku ŭ Adnakłaśnikach i kaža ciapier: «Maje pohlady zaŭsiody pry mnie»
«Naša Niva» pisała, što novym staršynioj Kobrynskaha rajvykankama staŭ 42-hadovy Michaił Hryškievič. Da hetaha jon uznačalvaŭ sielskuju haspadarku «Žuraŭlinaje» ŭ Pružanskim rajonie.
Michaił Hryškievič u furažcy. Fota z ok.ru.
U spadara Hryškieviča akazałasia dźvie staronki ŭ sacyjalnaj sietcy «Adnakłaśniki», kudy čynoŭnik źmiaščaŭ samy rozny prapucinski i antyŭkrainski kantent. Pa stanie na ranicu 25 maja adna z staronak Hryškieviča ŭ «Adnakłaśnikach» była vydalenaja. Da druhoj, mahčyma, Hryškievič straciŭ dostup.
My patelefanavali viertykalščyku, kab daviedacca, ci była niejkaja reakcyja na jahonuju staronku i čamu jon vyrašyŭ vydalić akaŭnt.
«A jakaja vam roźnica, ja intervju nikomu nie daju», — adkazaŭ jon.
Moža, Hryškievič źmianiŭ svaje pohlady?
«Maje pohlady zaŭsiody pry mnie, čamu ja z kimści imi pavinien dzialicca?» — adkazvaje pytańniem na pytańnie kiraŭnik Kobryna.
Ale navošta tady dzialiŭsia imi stolki hadoŭ u «Adnakłaśnikach»?
«Nu, dzialiŭsia ŭ «Adnakłaśnikach», ciapier — nie. Maje pohlady zaŭsiody pry mnie», — u druhi raz paŭtaryŭ Hryškievič.
My jašče spytali, ci nie pieraškadžajuć staršyni pamiežnaha z Ukrainaj rajona takija antyŭkrainskija pieraposty, jakija Hryškievič dazvalaŭ sabie?
«Ja nijakich kamientaraŭ nikomu nie daju. Heta, moža, [vy] ličycie, što ja kahości padstaŭlaju, ja tak nie liču», — padsumavaŭ staršynia Kobrynskaha rajvykankama.
