Hurkoŭ vystaviŭ pieramožny šalik na aŭkcyjon, kab sabrać hrošy na pieršy biełaruski pomnik Kaściušku
Užo amal miesiac minuŭ z momantu, kali Hleb Łabadzienka abviaściŭ pra zbor srodkaŭ na skulpturu Tadevušu Kaściušku ŭ Mieračoŭščynie, dzie naradziŭsia nacyjanalny hieroj Biełarusi, Polščy i ZŠA.
Na dadzieny momant sabrana bolš za 15 tysiač rubloŭ — heta 85% ad nieabchodnaj sumy. Da zaviaršeńnia zboru srodkaŭ zastajecca ŭsiaho dva dni.
Kab padtrymać kampaniju, tajbaksior Vital Hurkoŭ, jaki niekalki dzion tamu ŭ čarhovy raz staŭ čempijonam śvietu, vystaviŭ na aŭkcyjon svoj šalik z Pahoniaj i Kalumnami dy nadpisam Belarus. Zdymak, dzie Hurkoŭ jakraz u hetym šaliku, dniami ablacieŭ biełaruskija ŚMI.
Umovy prostyja: chto achviaruje najbolšuju sumu na skulpturu Kaściušku za hetyja dva dni, atrymaje šalik u padarunak.
Pazmahacca za šalik, zrabiŭšy achviaravańnie
Treba skazać, što pieršapačatkova zajaŭleny košt vyrabu i ŭstalavańnia skulptury Tadevušu Kaściušku byŭ zaŭvažna mienšy. Adnak tady nie płanavałasia, što fihura budzie stajać na pjedestale, jaki, akazałasia, zusim nie tanny.
«Pakolki heta rostavaja fihura, to, kaniečnie, na pjedestale jana budzie vyhladać lepš. Hranitny dabrotny pjedestał — sprava nie tannaja, tamu suma zboru była pavialičanaja. Ale jana ŭžo amal što ahoranaja ludźmi, zastałosia sabrać usiaho 15 adsotkaŭ, na heta jość dva dni, — tłumačyć Hleb Łabadzienka. — Adnak kali hrošy za dva dni nie źbiarucca, heta nie značyć, što fihury nie budzie. Heta značyć tolki toje, što spatrebicca krychu bolš času, kab daźbirać srodki. Ale ŭžo ciapier adpraŭlenaja pieradapłata majstru, jaki budzie adlivać skulpturu, heta bolš za pałovu sumy. Praca aktyŭna idzie».
Raspracavaŭ eskiz skulptury Henik Łojka, adnak vyrabić jaje ŭkrainski majstar. Toj samy, što zrabiŭ na zamovu biełaruskaj dyjaspary ŭ Šviejcaryi pomnik Kaściušku, jaki 21 kastryčnika adkryli ŭ Załaturnie. Hleb zapeŭnivaje, što adzinaja pryčyna, pa jakoj pomnik robicca nie ŭ Biełarusi, jak i ŭ vypadku sa šviejcarskaj skulpturaj, — finansavaja. Va Ukrainie heta kaštuje ŭ čatyry razy mienš.
«Sabrać 20 tysiač dalaraŭ u nas, na žal, niama mahčymaści. Ja i tak baču pa achviaravańniach, što ludzi addajuć apošniaje, chto kolki moža. Samyja častyja achviaravańni — heta 5, 10, 20 rubloŭ, — kaža Hleb. —
Mianie vielmi kranuła, kali na kursy «Mova Nanova» ŭ Minsku pryjšoŭ čałaviek pavažnaha ŭzrostu ŭ śpiacoŭcy z nazvaj budaŭničaj arhanizacyi i prynios piać rubloŭ. Jon skazaŭ, što nie maje kartki, ale pračytaŭ u haziecie pra zbor hrošaj, źviazaŭsia z redakcyjaj, daviedaŭsia, jak pieradać srodki. Viedajecie, hetyja piać rubloŭ nie mienš kaštoŭnyja za 500 rubloŭ, maksimalnaje razavaje achviaravańnie, jakoje my majem na siońnia. Heta budzie sapraŭdy narodnaja skulptura».
Łabadzienka dadaje, što ŭ zadumie źmiaścić u samim muziei Tadevuša Kaściuški ŭ Mieračoŭščynie pieralik imionaŭ i proźviščaŭ usich, chto achviaravaŭ na skulpturu. Kab kožny z hetych ludziej, pryjechaŭšy tudy, moh ubačyć svajo imia, bo fihura ŭstalavanaja dziakujučy jamu ŭ tym liku.
