Łukašenka — ministru abarony Azierbajdžana: U nas da azierbajdžancaŭ naohuł niama nijakich pretenzij
Alaksandr Łukašenka 9 kastryčnika sustreŭsia ź ministram abarony Azierbajdžana Zakiram Hasanavym i abmierkavaŭ pierśpiektyvy raźvićcia supracoŭnictva dźviuch krain u vajenna-techničnaj halinie, piša BiełTA.
Kiraŭnik dziaržavy adznačyŭ, što Biełaruś i Azierbajdžan praciahvajuć supracoŭnictva, u tym liku ŭ vajenna-techničnaj śfiery.
«Nie chaču ni pierad kim apraŭdvacca, jaki charaktar nosić naša supracoŭnictva. Chaču tolki skazać adno, što našy adnosiny ni ŭ jakim razie nie parušajuć nivodnuju mižnarodnuju damovu, nivodnuju rezalucyju Rady Biaśpieki i AAN u cełym.
My suvierennaja niezaležnaja dziaržava, i my majem prava vyznačać tyja napramki supracoŭnictva, jakija adpaviadajuć duchu času, zapytam našych dziaržaŭ», - padkreśliŭ biełaruski kiraŭnik.
Łukašenka taksama padkreśliŭ braterski charaktar adnosin pamiž narodami dźviuch krain. «My byli ŭ adnoj krainie. U nas da azierbajdžancaŭ naohuł niama nijakich pretenzij. My ź vialikim pavahaj stavimsia da ich. I, samaje hałoŭnaje, ja dobra pamiataju, što ŭ ciažkija časy vaš prezident zaŭsiody padstaŭlaŭ plačo biełaruskaj dziaržavie, — skazaŭ Alaksandr Łukašenka. — My heta ŭsio vielmi dobra pamiatajem i hatovyja - kali my niešta zmožam zrabić dla Azierbajdžana — heta zrabić dla taho, kab vaš narod žyŭ u biaśpiecy, dziaržava raźvivałasia, a Azierbajdžan i narod jahony byŭ ščaślivym kab dachody nasielnictva raśli i kab azierbajdžancy byli jašče bahaciejšyja. My budziem pieraśledvać tolki hetyja vysakarodnyja mety».
«I, naturalna, kab Azierbajdžan siabie adčuvaŭ dakładna tak, jak Biełaruś — spakojna, nadziejna, treba macavać abaronu. Ničoha novaha. Tamu my razam z vami pracujem u hetym płanie i budziem praciahvać pracavać», - dadaŭ jon.
Kiraŭnik biełaruskaj dziaržavy taksama asabliva adznačyŭ jaho siabroŭskija adnosiny z prezidentam Azierbajdžana Ilchamam Alijevym i paprasiŭ pieradać jamu samyja lepšyja pažadańni. «Dumaju, u bližejšy čas my sustreniemsia, u nas budzie mahčymaść pahavaryć na roznyja temy», - skazaŭ Łukašenka.
