Ministerstva abarony ŭ ličbach patłumačyła, čamu jany nie prajhrali infarmacyjnuju vajnu na «Zachadzie-2017»
Ministerskaja «Biełaruskaja vajennaja hazieta» apublikavała tekst-reakcyju na zajavy pra infarmacyjny pravał ideołahaŭ Minabarony padčas praviadzieńnia «Zachadu-2017».
Nahadajem, što vučeńni (napiaredadni ich, u čas i paśla) supravadžalisia infarmacyjnymi ŭkidami susiednich krain, a taksama nieprychavanymi pravakacyjami, kštałtu zajavaŭ Rasii pra pieramiaščeńnie tankavaj dyvizii ŭ Biełaruś, a taksama vykradańnie ŭkrainskaha internet-bajca Paŭła Hryba i hastrolaŭ pa Biełarusi prapucinskich frykaŭ z «NODa».
U suviazi ź mlavaj reakcyjaj na fejki, niazładžanaj pracaj z žurnalistami i abmiežavanym dostupam na palihony, niekatoryja ekśpierty acanili ŭzrovień raboty pres-słužby Minabarony (jakaja składajecca pieravažna ź piensijanieraŭ) jak niezadavalniajučy.
Što na heta adkazała pres-słužba Minabarony praz publikacyju ŭ aficyjnaj haziecie?
Voś što jany pišuć:
«Kali stavić pytańnie pra toje, chto vyjhraŭ infarmacyjnuju vajnu, a chto prajhraŭ, to vidavočna: kto schłusiŭ — toj i prajhraŭ! To bok ANIVODNY Z PRAHNOZAŬ NIESIABROŬSKICH DA BIEŁARUSI I RASII ŚMI I ADKAZNYCH ASOBAŬ NIE SPRAŬDZIŬSIA [vyłučana ŭ aryhinale — NN). Nie, my nie skažam, što ŭsie hetyja haziety, sajty, palityki i žurnalisty chłusili svajoj aŭdytoryi, a vykažamsia ŭ duchu času — HETUJU BITVU INFARMACYJNAJ VAJNY JANY PRAJHRALI. Praduli. Praspali. Prapuścili. Pra…. (dalej, čytač, prydumajcie sami), — havorycca ŭ publikacyi «Vajennaj haziety».
U śviedčańnie pieramohi pryvodziacca ličby.
«Ź inšaha boku, usie źviony vajennaj infarmacyjnaj miedyjamašyny adpracavali vydatna — voś vam fakty. Tolki na respublikanskich telekanałach vyjšła ŭ efir 393 siužety ahulnaj praciahłaściu 19 hadzin 34 chviliny. Drukavanyja ŚMI apublikavali 182 materyjały, u internecie takich bolš jak 500!» — dekłarujuć jany.
Kamu ž my prajhrali infarmacyjnuju vajnu? — rytaryčna pytajucca aŭtary publikacyi. Jany «nie bačać imaviernaha praciŭnika».
Čytajcie taksama: «Nam treba Infavojski». «Treba mianiać infarmacyjnuju sistemu». Što kažuć ekśpierty pa vynikach «Zachadu-2017»
