Галоўным ідэолагам Гродна прызначылі чалавека з КДБ
Начальнікам Галоўнага ўпраўлення ідэалагічнай работы і па справах моладзі Гродзенскага аблвыканкама прызначаны Ігар Міхайлавіч Булаўка, паведамляе «Гродзенская праўда».
Звычайна газета піша пра чыноўнікаў выканкама куды больш, а ў гэты раз абмежавалася толькі адным радком, звяртае ўвагу гродзенскі рэсурс s13.ru. Верагодна, справа ў тым, што пра Ігара Міхайлавіча ў сетцы не так шмат інфармацыі. Напрыклад, у сакавіку 2019 года газета пісала пра пасяджэнне абласнога каардынацыйнага савета суб'ектаў прафілактыкі і камісіі па справах непаўналетніх аблвыканкама. На ім выступіў тады яшчэ начальнік аддзела абароны канстытуцыйнага ладу і барацьбы з тэрарызмам Упраўлення КДБ па Гродзенскай вобласці Ігар Булаўка.
16 сакавіка Аляксандр Лукашэнка даў згоду на прызначэнне былога начальніка Галоўнага ўпраўлення ідэалагічнай работы і па справах моладзі Гродзенскага аблвыканкама Аляксандра Вярсоцкага старшынёй Свіслацкага райвыканкама.
