Будзе цяжка: сталі вядомыя ўсе сапернікі хакейнай зборнай Беларусі па алімпійскай кваліфікацыі
У нядзелю ўвечары завяршыўся трэці раўнд хакейнай кваліфікацыі на Алімпійскія гульні 2022 года. Пераможцамі падгруп G, H і J сталі каманды Славеніі, Польшчы і Венгрыі адпаведна, паведамляе hockey.by
Пераможцам групы Н сенсацыйна стала зборная Польшчы, якая ў Нур-Cултане апярэдзіла Нідэрланды, Украіну і Казахстан. У вырашальнай сустрэчы палякі перамаглі гаспадароў — 3:2.
Такім чынам, за права гуляць на Зімовай Алімпіядзе ў Пекіне ў 2022 г. зборная Беларусі паспрачаецца з камандамі Славакіі, Аўстрыі і Польшчы.
Пуцёўкі на АГ-2022 атрымаюць тры пераможцы квартэтаў. Спаборніцтвы ў нашай чацвёрцы прыме Славакія. Матчы фінальнай алімпійскай кваліфікацыі будуць згуляныя з 27 па 30 жніўня 2020 года.
Група Е (Латвія): Латвія, Францыя, Італія, Венгрыя.
Група F (Нарвегія): Нарвегія, Данія, Паўднёвая Карэя, Славенія.
У хакейным турніры Алімпіяды возьмуць удзел 12 каманд: 8 зборных, якія размяшчаюцца на 1-8 месцах у рэйтынгу IIHF, Кітай як краіна-гаспадыня спаборніцтваў, а таксама тры пераможцы фінальных кваліфікацыйных турніраў.
