Праз год Туркменістан выявіў недапрацоўкі ў пабудаваным Беларуссю буйным калійным камбінаце
Туркменістан рыхтуе спіс прэтэнзій беларускаму боку з прычыны будаўніцтва Гарлыкскага калійнага горна-абагачальнага камбіната. Пра гэта паведамляюць мясцовыя СМІ.
Падчас нядаўняй справаздачы Кабінета міністра Туркменістана высветлілася, што «беларускія спецыялісты, якія з'яўляюцца генеральнымі падрадчыкамі будаўніцтва дадзенага комплексу, не ў поўнай меры выканалі свае дагаворныя абавязацельствы». Таму прэзідэнт Гурбангулы Бердымухамедаў «даў канкрэтныя даручэнні віцэ-прэм'еру, міністру замежных спраў Р. Мярэдаву, старшыні Дзяржаўнай камісіі па правядзенні праверкі Гарлыкскага горнаруднага комплексу».
ГАК у мястэчку Гарлык быў урачыста адкрыты 31 сакавіка 2017 года прэзідэнтамі Туркменістана і Беларусі. Будаўніцтва комплексу з чэрвеня 2009 года ажыццяўляла кампанія «Белгархімпрам». Працэс ішоў няпроста. Некалькі гадоў таму ўлады Туркменістана нават абвінавацілі Беларусь у зрыве тэрмінаў будаўніцтва, Мінск папракнуў у зрыве тэрмінаў аплаты.
Меркавалася, што новае прадпрыемства коштам больш за 1 мільярд даляраў задаволіць не толькі патрэбы сельскай гаспадаркі Туркменістана, але і дазволіць экспартаваць запатрабаваную на сусветным рынку прадукцыю. Комплекс магутнасцю 1,4 мільёна тон калійных угнаенняў у год з'яўляецца найбуйнейшым у Цэнтральнай Азіі.
Варта сказаць, што ўлады Беларусі думалі пабудаваць і другі горнаабагачальны камбінат у туркменскай пустыні коштам у 1,4 млрд даляраў. Апошні тэрмін падачы тэндарных прапаноў быў 26 чэрвеня 2017 года. «Мы не накіроўвалі заяўку», — сказаў 7 верасня мінулага года Іван Галаваты, гендырэктар «Беларуськалія», якому належыць кантрольны пакет акцый «Белгархімпрамам». Ён удакладніў, што кампанію не задаволілі ўмовы, якія прапанавалі ўлады Туркменістана.