Мост цераз Сож на трасе М8 прызнаны аварыйным
Мост цераз Сож на трасе М8 прызнаны аварыйным, паведамляе тэлеканал АНТ. Зараз у мэтах бяспекі па ім абмежаваны рух грузавога транспарту.
Мост звязвае аб'язную дарогу, якая вядзе ў абласны цэнтр, — гэта ўчастак рэспубліканскай трасы M8 (мяжа Расіі — Віцебск — Гомель — мяжа Украіны). Як паказала экспертыза, з-за карозіі ў адным з блокаў моста сапсавалася арматура. Велікагрузы цяпер накіроўваюць праз горад: аб'язны шлях займае каля 8 км. Рух для легкавых машын пакуль адкрыты.
Паводле словаў начальніка ўпраўлення эксплуатацыі аўтамабільных дарог прадпрыемства «Гомельаўтадар» Сяргея Мазгова, на падыходах да моста былі ўсталяваныя адпаведныя дарожныя знакі, а таксама схемы, якія інфармуюць кіроўцаў, у якіх поўная маса транспартнага сродку перавышае 5 т, пра неабходнасць рухацца ў абыход дадзенага аўтадарожнага моста. «Від рамонту і яго тэрміны будуць вызначаны Міністэрствам транспарту Беларусі ў найбліжэйшы час», — сказаў ён.
