Барацьбу за дом прадзеда ў Давыд-Гарадку мінчанка прайграла. Аб'ект знеслі
Дом знеслі, а на яго месцы ўжо робяць аўтамабільную стаянку.
Як паведамілі Медыя-Палессю ў Давыд-Гарадоцкім гарсавеце, будаўніцтва стаянкі пад транспарт для сярэдняй школы і дзіцячага сада з рамонтам вуліцы і рэканструкцыяй брацкай магілы, размешчанай праз дарогу ад новай стаянкі, запланаваны ў рамках падрыхтоўкі да абласнога свята работнікаў вёскі.
Барацьбу за двухпавярховы дом з 2016 года вяла Надзея Туроўская. Яна — праўнучка Сямёна Кулагі, які пабудаваў гэты дом для сваёй сям'і ў 1936 годзе. У 1939 годзе з прыходам савецкай улады двухпавярховы дом забралі, сям'і дазволілі жыць у двух яго пакоях у якасці кватарантаў. Пасля вайны дом быў адміністрацыйным будынкам. У апошнія гады яго выкарыстоўвалі ў якасці гасцініцы, дзе было каля дзесяці нумароў. Дом знаходзіўся на балансе Столінскага ЖКГ.
Калі мясцовыя ўлады прынялі рашэнне аб зносе дома, Надзея Туроўская прапанавала выкупіць дом або здаць ёй яго ў арэнду. Куды толькі не звярталася жанчына, каб дом не зносілі. Яна напісала лісты са зваротамі ў розныя інстанцыі, а калi 11 жніўня ўбачыла, што працоўныя пачалі здымаць з дома вагонку, то распавяла пра гэта ў СМІ. Аднак усе намаганні Надзеі Тураўскай апынуліся дарэмныя. Дом знеслі.
