Гайдукевіч-малодшы: «Трэба ўключыць у камісію па ўвекавечванні Курапат Пазняка»
Алег Гайдукевіч — былы начальнік Фрунзенскага РУУС Мінска, а цяпер намеснік кіраўніка Ліберальна-дэмакратычнай партыі —выказаўся наконт сітуацыі з помнікам у Курапатах.
Нагадаем, што ў месцы масавых растрэлаў плануецца ўстанавіць мемарыял, але пакуль няма згоды, хто ўзначаліць камісію па зацвярджэнні помніка — Адміністрацыя прэзідэнта прапанавала гэтую ролю нобелеўскай лаўрэатцы Святлане Алексіевіч, але тая адмовіла:
«Людзі сядзяць у турмах, столькі арыштаў было на Дні Волі, такая нянавісць, з такой нянавісцю білі людзей. Таму неяк дзіўна было б мне ўдзельнічаць ва ўсім гэтым», — сказала Алексіевіч і дадала, што ўзначальваць такую камісію мог бы толькі Зянон Пазняк.
І вось, Гайдукевіч таксама выказаўся ў падтрымку пазіцыі Алексіевіч.
«Падтрымліваю прапанову Святланы Алексіевіч уключыць у камісію па ўвекавечванню Курапат Зянона Пазняка! Трэба прызнаць, Зянон Пазняк зрабіў шмат для таго, каб беларусы даведаліся пра Курапаты! Уключэнне Пазняка ў дзяржаўную камісію стала б рэальным пацверджаннем таму, што ў Беларусі могуць чуць адзін аднаго людзі самых розных палітычных поглядаў», — напісаў ён у сваім фэйсбуку.
У каментарах адзначыўся Пётра Пятроўскі, часты госць палітычных ток-шоу на БТ і АНТ. «Цікавы эксперымент. Як Зянон Пазняк будзе ўвекавечваць ахвяраў сталінскіх рэпрэсій, якія збольшага і былі камуністамі. Увекавечыць рэпрэсаваных камуністаў антыкамуністу будзе не так проста», — адрэагаваў ён.