Hajdukievič-małodšy: «Treba ŭklučyć u kamisiju pa ŭviekaviečvańni Kurapat Paźniaka»
Aleh Hajdukievič — były načalnik Frunzienskaha RUUS Minska, a ciapier namieśnik kiraŭnika Libieralna-demakratyčnaj partyi —vykazaŭsia nakont situacyi z pomnikam u Kurapatach.
Nahadajem, što ŭ miescy masavych rastrełaŭ płanujecca ŭstanavić miemaryjał, ale pakul niama zhody, chto ŭznačalić kamisiju pa zaćviardžeńni pomnika — Administracyja prezidenta prapanavała hetuju rolu nobieleŭskaj łaŭreatcy Śviatłanie Aleksijevič, ale taja admoviła:
«Ludzi siadziać u turmach, stolki aryštaŭ było na Dni Voli, takaja nianaviść, z takoj nianaviściu bili ludziej. Tamu niejak dziŭna było b mnie ŭdzielničać va ŭsim hetym», — skazała Aleksijevič i dadała, što ŭznačalvać takuju kamisiju moh by tolki Zianon Paźniak.
I voś, Hajdukievič taksama vykazaŭsia ŭ padtrymku pazicyi Aleksijevič.
«Padtrymlivaju prapanovu Śviatłany Aleksijevič uklučyć u kamisiju pa ŭviekaviečvańniu Kurapat Zianona Paźniaka! Treba pryznać, Zianon Paźniak zrabiŭ šmat dla taho, kab biełarusy daviedalisia pra Kurapaty! Uklučeńnie Paźniaka ŭ dziaržaŭnuju kamisiju stała b realnym paćvierdžańniem tamu, što ŭ Biełarusi mohuć čuć adzin adnaho ludzi samych roznych palityčnych pohladaŭ», — napisaŭ jon u svaim fejsbuku.
U kamientarach adznačyŭsia Piotra Piatroŭski, časty hość palityčnych tok-šou na BT i ANT. «Cikavy ekśpierymient. Jak Zianon Paźniak budzie ŭviekaviečvać achviaraŭ stalinskich represij, jakija zbolšaha i byli kamunistami. Uviekaviečyć represavanych kamunistaŭ antykamunistu budzie nie tak prosta», — adreahavaŭ jon.