Pusty nadzieł mastaka Viktara Alšeŭskaha ŭ «Drazdach-2» pradajecca za $350 tysiač
Na sajtach ahienctvaŭ nieruchomaści źjaviłasia abjava ab prodažy nadzieła ŭ Viaśnincy — tak zvanym katedžnym pasiołku «Drazdy-2».
«Prestyžny rajon vadaschovišča Drazdy, učastak (33ch32m) u zonie katedžnaj zabudovy. Vielmi pryhožaje miesca, paśpiachovyja i ŭpłyvovyja susiedzi. Učastak ačyščany, błočny padmurak, kamunikacyi, prajekt doma», — havaryłasia ŭ abviestcy (ciapier jana vydalena, ale zachavałasia ŭ kešy Huhła). Haspadar prosić za nadzieł $349 tysiač.
Chto ž vyrašyŭ pamianiać «paśpiachovych i ŭpłyvovych susiedziaŭ» na realnyja hrošy?
Jak stała viadoma «Našaj Nivie», na prodaž byŭ vystaŭleny nadzieł mastaka Viktara Alšeŭskaha. Heta adzin ź niekalkich pradstaŭnikoŭ tvorčaj elity, chto atrymaŭ darahuju ziamlu ŭ «Drazdach-2»
Alšeŭski — łaŭreat Dziaržaŭnaj premii Biełarusi za sieryju tvoraŭ dla Homielskaha pałacava-parkavaha ansambla (razam z Uładzimiram Savičam i Uładzimiram Zinkievičam, jaki taksama zajmieŭ elitny nadzieł), u 2013 hodzie mastaku byŭ uručany miedal Francyska Skaryny.
Čamu Alšeŭski vyrašyŭ pradać svoj učastak, «Našaj Nivie» vyśvietlić nie ŭdałosia.
«Heta vypadkovaja reč. Ja ničoha nie pradaju! — zapeŭniŭ Viktar Alšeŭski. — Ja pazvaniu i skažu, kab jany źniali heta. Nie viedaju, chto heta pastaviŭ».
Praź niekalki chvilin abjava nasamreč źnikła z katałoha katedžaŭ.
Adznačym, što $350 tysiač — papularny lik siarod ułaśnikaŭ ziamli ŭ «Drazdach-2». Stolki ž chacieŭ za svoj nadzieł kolišni staršynia kancerna «Biełnaftachim» Ihar Žylin. Paśla publikacyi ŭ «NN» jaho abjava taksamabyła vydalena z sajtaŭ ahienctvaŭ nieruchomaści.