Siłaviki zatrymali siemiarych padletkaŭ, jakich vinavaciać u teraryźmie i zdradzie dziaržavie
Na ANT vypuścili film pra padletkaŭ, jakich nibyta zavierbavała SBU.
Maryja Misiuk. Skryn videa ANT
Jak śćviardžaje prapahanda, padletki abjadnalisia, kab rabić dyviersii pa navodcy ŭ Biełarusi, a paśla i ŭ Rasii. Praŭda, adzinyja ich praviedzienyja akcyi, jakija zhadvajuć u filmie, — rasklejvańnie ŭlotak.
Hrupu sabrała dziaŭčynka-padletak z Ukrainy Maryja Misiuk. Jana z baćkami pierajechała ŭ Biełaruś paśla pačatku vajny ŭ 2022-m. Maryja vučyłasia ŭ mastackim kaledžy ŭ Miry. Prapahanda nazyvaje jaje kamandziram terarystyčnaj jačejki «Čornyja sałaŭi» i śćviardžaje, što za joj stajała SBU.
Schiema hrupy, pakazanaja prapahandaj. Skryn videa ANT
U hrupie było jaščo 5 čałaviek: Siarhiej Žyhaloŭ, Trafim Barysaŭ, Dźmitryj Zacharoška, Anastasija Klimienka, Alaksandra Pulinovič. Jany vučylisia ŭ kaledžach u Minsku, Niaśvižy, Baranavičach, Łunincy.
18-hadovy Trafim Barysaŭ. Skryn videa ANT
Jak śćviardžaje prapahanda, maładziony źbiralisia na baranavickaj kvatery, kab padrychtavacca da svajoj pieršaj surjoznaj akcyi — sabrać vybuchoŭku i ŭzarvać baranavickaje adździaleńnie milicyi ci prakuraturu.
Maryju Misiuk abvinavačvajuć pa č. 2 art. 289 (akt teraryzmu).
Jakoje abvinavačańnie vystavili inšym padletkam, nie paviedamlajecca. Taksama nie zrazumieła, ci zatrymanaja ciapier Alaksandra Pulinovič.
19-hadovy Siarhiej Žyhaloŭ. Skryn videa ANT
Taksama ŭ siužecie «Dzieci na prycele» raskazvajecca niekalki paralelnych historyj. Adna ź ich — pra zatrymanaha Daniiła Harasima. 19-hadovy chłopiec abvinavačvajecca pa č. 1 art. 356 (zdrada dziaržavie). U filmie raskazvajecca, što jamu dali zadańnie źjeździć u Asipovičy i źniać rakietna-artyleryjskuju bryhadu 29 śniežnia 2023 hoda. Ale admietna, što ź pieršaha ž zadańnia siłaviki rabili apieratyŭnuju zdymku — uźnikaje pytańnie, ad kaho ž toje zadańnie pastupiła.
Daniił Harasim. Skryn videa ANT
Čarhovaja paralelnaja linija — historyja Stanisłava Šapiela. Jon, jak śćviardžajecca, pahadziŭsia być kurjeram, pierapraŭlać hrošy. Taksama chłopiec zapisvaŭ videa, što suprać Pucina i padtrymlivaje Ukrainu. Miarkujučy pa formie i bircy, Stanisłaŭ užo adbyvaje pakarańnie.
Stanisłaŭ Šapiel
Jość i čaćviortaja historyja — student BNTU Siamion Vasilevič i jaho siabar, jakoha tak i nie pradstavili. Jany nibyta vyrablali vybuchoŭku.
Siamion Vasilevič
