U Mahilovie adšukali nadmahille z hierbam padkanclera VKŁ Astafieja Vałoviča
Nadmahilnuju plitu z vyjavaj hierba viadomaha biełaruskaha rodu Vałovičaŭ adšukali ŭ Mahilovie na miascovych Uśpienskich mohiłkach.
Pavodle znaŭcaŭ daŭniny, znojdzienaje pachavańnie —najstaražytniejšaje ŭ Mahilovie. Nadmahille datujecca kancom XVI stahodździa.
Nadmahilnaja plita z vyjavaj hierba Vałovičaŭ.
«Heta nadmahilnaja plita, na jakoj hierb Astafieja Vałoviča, albo pradstaŭnika rodu Vałovičaŭ, jaki mieŭ taki ž hierb, samaja staražytnaja ŭ Mahilovie. Jana na adnych z samych staražytnych mohiłak horadu — Uśpienskich», — kazaŭ dyrektar muzeju historyi Mahilova Alaksiej Baciukoŭ.
Pavodle jaho Astafiej Vałovič — padkancler Vialikaha Kniastva Litoŭskaha, mahnat, mahiloŭski starasta. Pachavańni rodu Vałovičaŭ znachodziacca pieravažna na Haradzienščynie.
Tałakoŭcy paradkujuć pachavańnie Vałoviča.
«Astafiej Vałovič, mahčyma, adzin ź inicyjataraŭ i suaŭtar statutu VKŁ. Siabar i moža nastaŭnik Lva Sapiehi, — davodziŭ Alaksiej Baciukoŭ, — Jość versija, što Vałovič i inicyjavaŭ vydańnie statutu, zakłaŭ idei dla jaho, a potym Sapieha sabraŭ statut u adno cełaje».
Mahiloŭski historyk Ihar Puškin miarkuje, što znojdzienaje pachavańnie adnaho z pradstaŭnikoŭ Vałovičaŭ. Pavodle navukoŭca pra heta kaža składanaja vyjava hierba, u jakoj prahladajecca dźvie častki: žanočaja i mužčynskaja.
Ihar Puškin adznačaje, što na plitu natknuŭsia jašče na pačatku 1990-ch hadoŭ mienski archieolah Mikoła Byčkoŭ. Tady ž miascovaja hazeta «Ratuša» dała apisańnie hetaha nadmahilla. Da našaha času nadmahilnaja plita zastavałasia raskołataj i ŭrosłaj u ziamlu.
Ź inicyjatyvy Puškina Muzej historyi Mahilova sklikaŭ tałaku, jakoju ŭparadkavali pachavańnie.
Tak mahiła vyhladaje paśla tałaki.
«Siońnia, dziakujučy hieohrafu Iharu Šaruchu, my vyznačylisia, što nadmahilnaja plita vyrablenaja ź piasčaniku. A heta charakterna dla kanca 16-ha — pačatku 17 stahodździa. Heta paćviardžaje i vyjava herbu. Raniejšych hieraldyčnych vyjavaŭ u Mahilovie niama. U hetym i kaštoŭnaść hetaj plity», — kazaŭ Ihar Puškin.
Try hady tamu vakoł plity była draŭlanaja aharodža, jakoj ciapier niama. Pavodle ŭdzielnikaŭ tałaki ŭparadkavańnie — heta toje, što ŭ siłach hramadzkaści.
Na Ŭśpienskich mohiłkach pachavanyja pieravažna pradstaŭniki haradzkoj pravasłaŭnaj znaci. Tut mahiły viadomaha mahiloŭskaha rodu Hartynskich. Jość i pachavańni pratestantaŭ.
Mahiły rodu Hartynskich.
