Błohier Šabucki abaraniaje ściah SSSR: Vieterany ličać jaho ściaham pieramohi
Błohier i eks-bajec pałka Kalinoŭskaha Maksim Šabucki i ciapierašni bajec Alaksandr «Łachvič» Naŭkovič u efiry «Jeŭraradyjo» vykazalisia pra vykarystańnie ściaha SSSR.
Padčas razmovy ŭ studyi «Jeŭraradyjo» zakranuli toje, što błohier Maksim Šabucki ŭ svaich efirach vykarystoŭvaje ściah SSSR.
Na pohlad samoha błohiera, čyrvony ściah źviazany ź pieramohaj u Vialikaj Ajčynnaj vajnie, a siońnia na hieapalityčnaj arenie adbyłasia manapalizacyja hetaj padziei Rasijaj.
«Było b karektniej pačakać da taho adrezku, kali pamre apošni vieteran, jaki sapraŭdy ličyć jaho ściaham pieramohi. <…> Hetyja ludzi prajšli vajnu»,
— havoryć błohier i śćviardžaje, što pamiataje, jak «nie adzin raz u Biełarusi kali [vieteranam] zadavali pytańnie, što [aznačaje] dla vas hety ściah, jany havaryli, što dla ich heta ściah pieramohi».
Błohier i były bajec pałka Kalinoŭskaha Maksim Šabucki (sprava) i dziejsny bajec i błohier Alaksandr «Łachvič» Naŭkovič. Skryn videa EuroradioLive / YouTube
Na pohlad Šabuckaha, toje, što siońnia pad čyrvonym ściaham va Ukrainie ździajśniajucca złačynstvy, nielha źmiešvać ź minułym.
«Čysta z čałaviečych katehoryj, pakińcie hetych vieteranaŭ, dajcie im dažyć. Budziem my novuju krainu z novymi ściahami budavać. Pakińcie historyju historykam. Zamiest taho, kab ładzić dyskusii pra ściahi, lepš rabić kanstruktyŭnuju pracu».
U svaju čarhu Alaksandr Naŭkovič zaŭvažyŭ, što vykarystańnie Šabuckim u svaich videa čyrvonaha ściaha tłumačycca tym, što jon pracuje na roznuju aŭdytoryju. Samomu ž Naŭkoviču čyrvony ściah nie padabajecca. Ale, jak zaŭvažaje bajec, jon moža padabacca inšym. Naprykład, biełaruskaj armii, za jakuju ŭ 2020-m hodzie taksama išło zmahańnie.
«Padabajecca, nie padabajecca, heta nie važna. Treba prosta čuć tyja dumki, jakija tabie danosić čałaviek», — adznačaje «Łachvič».
Čytajcie taksama:
