Za tydzień da kradziažu z budynka HUBAZiK takuju ž sumu kanfiskavali ŭ turfirmy
Ni MUS, ni SK nie kamientujuć infarmacyju ab kradziažy 269150 dołaraŭ ź milicejskaha siejfa. U abodvuch viedamstvach admaŭlajucca paviedamić navat, praŭda heta albo nie.
Čytajcie taksama:
U Minsku ź siejfa HUBAZiKa skrali $270 tysiač?
«Biez kamientaryjaŭ», — adkazvajuć i aficyjny pradstaŭnik Śledčaha kamiteta Julija Hančarova, i kiraŭnik Upraŭleńnia infarmacyi MUS Kanstancin Šalkievič.
Ale jość Google. Na zapyt «269150 dołaraŭ, Minsk» siarod inšaha jon vydaje navinu za 29 śniežnia 2016 hoda.
«Padčas praviadzieńnia mierapryjemstvaŭ byŭ zatrymany dyrektar turfirmy. Ahienctva brała na siabie abaviazacielstva pa afarmleńni ŭsiaho pakieta dakumientaŭ. Całkam vyrablalisia daviedki ab najaŭnaści finansavych srodkaŭ na rachunkach, pra miesca pracy, u pašpartach prastaŭlalisia lipavyja štampy ab rehistracyi. Kali hramadzianina spyniali dla pravierki dakumientaŭ, to ŭ pašparcie stajaŭ štamp Minskaha rajona, vobłaści abo horada Minska», — kamientuje abstaviny kryminalnaj spravy staršy ŭpaŭnavažany pa asabliva važnych spravach Hałoŭnaha upraŭleńnia HUBAZiK Andrej Urazaŭ.
Tekst raźmieščany na sajcie ahienctva «Sputnik», jano spasyłajecca na siužet telekanała ANT. Cymus situacyi ŭ tym, što suma kanfiskavanych u turfirmy hrošaj dakładna supadaje z toj, jakaja praz tydzień paśla vystupleńnia Urazava ŭ ŚMI nibyta była skradzienaja ź milicejskaha budynka — roŭna 269150 dołaraŭ.
Atrymać kamientaryj staršaha ŭpaŭnavažanaha Andreja Urazava pakul nie atrymałasia. U Hałoŭnym upraŭleńni HUBAZiK (adkul nibyta skrali amal 270 tysiač dołaraŭ) Jeŭraradyjo paćvierdzili, što taki supracoŭnik nasamreč isnuje, ale ciapier pahavaryć ź im «niama mahčymaści praz toje, što jon na balničnym».
Na dapamohu znoŭ prychodzić amierykanski pošukavik. Akazvajecca, što paśla historyi z «ciomnaj» turfirmaj i kanfiskacyjaj 269150 dołaraŭ staršy ŭpaŭnavažany Andrej Urazaŭ pačaŭ… šukać novuju pracu. U kešy sajta vakansij flagma.by zachavałasia infarmacyja pra toje, što 40-hadovy minčanin Andrej Urazaŭ, padpałkoŭnik z vopytam pracy staršym upaŭnavažanym pa asabliva važnych spravach HUBAZiK šukaje pracu na pasadzie kiraŭnika słužby biaśpieki. Abjava raźmieščanaja 17 lutaha 2017 hoda, krychu bolš čym praź miesiac paśla mierkavanaha kradziažu z budynka HUBAZiK, dzie akurat pracavaŭ Urazaŭ.
Usio heta, viadoma, moža być supadzieńniem. Ale redakcyja Jeŭraradyjo tak nie dumaje.
