U Minsku ź siejfa HUBAZiKa skrali $270 tysiač?
Złačynstva było ździejśniena ranicaj 8 studzienia, ale pra jaho stała viadoma tolki ciapier.
U Adzinym dziaržaŭnym rejestry sudovych rašeńniaŭ Ukrainy źjaviłasia pastanova Šaŭčenkaŭskaha rajonnaha suda Kijeva. Śledčy chadajničaŭ ab tym, kab akazać dapamohu biełaruskim siłavikam pa kryminalnaj spravie №17128000037.
Jana była zaviedziena ŭ dačynieńni hramadzianina N, jaki abvinavačvajecca ŭ kradziažy ŭ asabliva bujnym pamiery (pakarańnie ad 3 da 12 hadoŭ z kanfiskacyjaj majomaści).
Biełaruski bok prasiŭ infarmacyju pra miescaznachodžańnie padazravanaha ad ukrainskich mabilnych apierataraŭ.
Zvyčajnaja sprava, kab adsačyć kantakty mierkavanaha złačyncy, jaki znachodzicca ŭ biahach. Niezvyčajnymi akazalisia abstaviny hetaj spravy, fabuła jakoj była pakazana ŭkrainskamu sudu.
Takim čynam, hramadzianin N «8 studzienia 2017 hoda kala 9 hadzin ranicy naŭmysna, z karyślivych mierkavańniaŭ, ź siejfa ŭ kabiniecie №107 administracyjnaha budynka pa adrasie: horad Minsk, vulica Revalucyjnaja, dom 3, tajemna vykraŭ hrašovyja srodki ŭ pamiery $269150».
Pa adrasie vuł. Revalucyjnaja, 3 raźmiaščajecca Hałoŭnaje upraŭleńnie pa baraćbie z arhanizavanaj złačynnaściu i karupcyjaj MUS Biełarusi (HUBAZiK). Inšych arhanizacyj u hetym budynku niama.
Viadoma, što 8 studzienia kala 13.00 padazravany pierasiok miažu i apynuŭsia na terytoryi Ukrainy. Tam N sustreŭsia z žančynaj (jaje asoba vyśvietlenaja), papiarednie ź joj stelefanavaŭšysia. Taksama ŭciakač mieŭ znosiny pa telefonie ź nieviadomym mužčynam.
9 studzienia kala 6 hadzin ranicy jon pakinuŭ Ukrainu i źjechaŭ u Rumyniju. Dzie jaho ślady i zhubilisia.
«Naša Niva» źviarnułasia pa kamientar u Ministerstva ŭnutranych spraŭ, čakajem adkazu.
