Supracoŭnik banka, jaki skraŭ bolš za 700 tysiač dalaraŭ, pakul nie znojdzieny
Miescaznachodžańnie Rusłana Frajemčuka, jaki ŭčyniŭ 25 krasavika 2015 hoda kradziež u asabliva bujnym pamiery ŭ ZAT «BSB-Bank», pakul nie ŭstanoŭlena, paviedamiŭ na pres-kanfierencyi 24 červienia namieśnik hienieralnaha prakurora Biełarusi Alaksiej Stuk.
«Vidać, toj bahaž, jaki jon vynies, dazvalaje sychodzić ad vyšuku», — prakamientavaŭ Stuk tuju akaličnaść, što abvinavačvanamu ŭdałosia schavacca i što jaho da hetaha času nie ŭdałosia zatrymać. Namieśnik hienprakurora skazaŭ, što «idzie aktyŭny vyšuk», i vykazaŭ upeŭnienaść u tym, što Frajamčuk budzie zatrymany.
Nahadajem, 27 krasavika minułaha hoda ŭ 9.46 pa śpieclinii 102 u milicyju źviarnulisia rabotniki ZAT «BSB-Bank» ź infarmacyjaj ab tym, što ŭ pamiaškańni raźlikova-kasavaha centra, raźmieščanaha ŭ Centralnym rajonie Minska, na płoščy Svabody, paškodžanyja płomby siejfaŭ.
U chodzie pieršapačatkovych apieratyŭna-vyšukovych mierapryjemstvaŭ było ŭstanoŭlena, što kradziež byŭ učynieny 25 krasavika z 18.24 da 20.53. Vykradziena: 690.000 dołaraŭ ZŠA, 64.000 jeŭra, 3.900.000 rubloŭ CB RF, 1.340 funtaŭ sterlinhaŭ, 1.000 šviejcarskich frankaŭ, 45.229 hryŭnaŭ i 100 złotych.
Ustanoŭlena, što da kradziažu hrošaj datyčny 43-hadovy supracoŭnik banka, jaki ažyćciaŭlaŭ kantrol za zabieśpiačeńniem unutrybankaŭskaha režymu, abaronu pierymietra i słužbovych pamiaškańniaŭ. 25 krasavika jon apošnim vychodziŭ z bankaŭskaj ustanovy.