U Biełarusi za piać hadoŭ uvieś žyły fond płanujecca abstalavać indyvidualnymi ličylnikami ciapła
U najbližejšyja piać hadoŭ płanujecca abstalavać indyvidualnymi ličylnikami ciapła ŭvieś žyły fond. Pra heta paviedamiŭ 29 krasavika ŭ Minsku na pres-kanfierencyi dyrektar departamienta pa enierhaefiektyŭnaści Dziaržstandarta Michaił Małašanka.
Jon nahadaŭ, što na hety momant usie kvatery abstalavanyja indyvidualnymi ličylnikami haračaj i chałodnaj vady. Pavodle jaho słoŭ, heta stymuluje nasielnictva ekanomić hetyja krynicy.
Pry hetym kiraŭnik departamienta adznačyŭ, što sistema ŭliku ciepłavoj enierhii pa indyvidualnych ličylnikach užo dzie-nidzie ŭkaranionaja: imi abstalavanyja damy, pabudavanyja z 2012-2013 hoda. «Ale heta tolki ŭ małoj častcy žyłoha fondu», — padkreśliŭ Małašanka.
Jon rastłumačyŭ, što ŭstanoŭka ličylnikaŭ budzie ažyćciaŭlacca za košt žycharoŭ. Ich ŭstanoŭka ŭ damach z haryzantalnaj razvodkaj nie ŭjaŭlaje składanaściaŭ, takija ličylniki zarehistravanyja ŭ rejestry. «Dla ich ŭstanoŭki nieabchodna valavoje rašeńnie ŭładaŭ. Taksama nieabchodna ŭžo ŭ prymusovym paradku abaviazvać tavarystvy ŭłaśnikaŭ, ŽESy vyrablać raźlik pa hetych pryborach. Pakolki nie va ŭsim žyłym fondzie, jaki ŭžo abstalavany, takija raźliki viaducca», — adznačyŭ dyrektar departamienta.
Pavodle jaho słoŭ, dla damoŭ ź viertykalnaj razvodkaj taksama isnujuć prybory ŭliku. «Adpaviedna nieabchodna ŭvieści hetyja prybory ŭ rejestr, kab ich možna było pa žadańni žychara ŭstalavać i raźličvacca. Jak heta było z pryborami ŭliku haračaj i chałodnaj vady. Žychary realna ŭbačyli ŭ žyroŭkach, što stali apłačvać ŭ razy mienš», — padkreśliŭ Małašanka.
Pavodle jaho słoŭ, taksama na dobraachvotnaj asnovie žychary mohuć ustaloŭvać i elektronnyja ličylniki elektraenierhii, jakija dazvalajuć raźličvacca pa dyfierencyjavanych taryfach u zaležnaści ad času sutak.
