Dźmitryj z budaŭničaha krana: «Mianie zrazumieli i adpuścili dadomu»
Ranicaj 29 krasavika adčajny viciebski budaŭnik Dźmitryj Stalaroŭ viartajecca ciahnikom dadomu. Za dzień da hetaha na budaŭnictvie stadyjona «Dynama» jon ładzić dziorzkuju i efiektnuju akcyju pratestu: lezie na vysačezny viežavy kran i patrabuje vypłaty zarobku. Uviečary Stalaroŭ spuskajecca na ziamlu, jaho zatrymlivajuć pieraapranutyja siłaviki i viazuć u Leninskaje RUUS Minska. Što adbyvałasia dalej, hieroj historyi raskazvaje Jeŭraradyjo.
«Pastavilisia da mianie z razumieńniem. Ja im pieradaŭ dakumienty i raskazaŭ ab svajoj prablemie ŭ padrabiaznaściach. Niekatoryja fakty adrazu ž paćvierdzilisia. I mianie adpuścili, paabiacali, što raźbiarucca, prymuć miery. Sieŭ na ciahnik i ranicaj byŭ užo ŭ Viciebsku. Siońnia mnie telefanujuć z raznastajnych pravaachoŭnych orhanaŭ, źbirajuć infarmacyju i papiery, kab akazać mnie jurydyčnuju dapamohu i pryniać miery».
Jeŭraradyjo: Učora vy nie zmahli raskazać žurnalistam, što padšturchnuła vas da takoha ŭčynku. Było viadoma tolki pra vyjhrany vami sud i što vam tak i nie viarnuli hrošy.
Dźmitryj Stalaroŭ: Prablema ŭ tym, što budaŭničyja firmy padmanvajuć ludziej, jakija pracujuć nie pieršy dzień i robiać spravu jakasna, sumlenna. Z AAT «DźvienskBud» ja sudziŭsia kala siami miesiacaŭ. Tam było šmat pytańniaŭ, spačatku spravu pakidali biez razhladu. U vyniku pa adnoj z zajavaŭ było rašeńnie (bryhadzie Stalarova pastanavili spłacić 64 miljony — Jeŭraradyjo). Ale mier pa vyniaćci hetych hrošaj nie pravodziłasia. Inviestar nie płaciŭ hienpadradčyku. Hienpadradčyk, u svaju čarhu, nie płacić mnie. Firma padała na likvidacyju. Sudovyja vykanaŭcy razvodzili rukami.
Jeŭraradyjo: Heta adzinaja pryčyna, čamu vy pajechali ŭ Minsk?
Dźmitryj Stalaroŭ: Z faktami niespraviadlivaści my sutyknulisia i ŭ TAA «Zorbud». Hrošy vypłacili, ale nie ŭsie. Ja pracu svaju vykanaŭ dobra, a jany nie paličyli patrebnym narmalna raspłacicca, skarystalisia ciažkim časam, kali niaprosta vieści biźnies. Ale i heta nie ŭsio… Bolš za miesiac ja i jašče adzin tavaryš pracavali z AAT «Junit-Aljans». I tam z nami nie raźličylisia, zvolnili vielmi dziŭnym čynam. Karaciej, u maim žyćci była vielmi praciahłaja čornaja pałasa.
Jeŭraradyjo: Z padačy minskaj milicyi razyšłasia infarmacyja, što vy — raniej sudzimy.
Dźmitryj Stalaroŭ: Heta niapraŭda. Sudzimy — heta kali jość rašeńnie suda. U mianie jašče suda nie było. Ja zaraz prachodžu pa spravie jak abvinavačany. Miarkuju, što tydni praz dva pačniecca sud.
Jeŭraradyjo: U čym akaličnaści hetaj kryminalnaj spravy?
Dźmitryj Stalaroŭ: Heta źviazana ź firmaj «Zorbud», pra jakuju ja vam užo raskazvaŭ.
Jeŭraradyjo: Nakolki viadoma, vam nie vypłačvali zarpłatu, i vy vyrašyli prychapić ich budaŭničy instrumient…
Dźmitryj Stalaroŭ: Kali być dakładnym, to ździejśniŭ kradziež. Hety ŭčynak kvalifikavali pa častcy 1 artykuła 205 Kryminalnaha kodeksa.
Jeŭraradyjo: Upieršyniu čujem, kab abvinavačany voś tak prosta kazaŭ, što ździejśniŭ kradziež.
Dźmitryj Stalaroŭ: Heta ŭžo ŭstanoŭlena. Jość peŭnyja fakty. Što tut utojvać? Žyćcio nie takoje doŭhaje, kab ja vas padmanvaŭ. Adnak sami razumiejecie, što mianie padšturchnuła ździejśnić hetaje pravaparušeńnie, navat złačynstva, možna skazać.
Jeŭraradyjo: Ci praŭda, što vy słužyli ŭ AMAPie?
Dźmitryj Stalaroŭ: Paśla vojska čatyry miesiacy byŭ tam na stažyroŭcy. Uładkoŭvaŭsia na słužbu, ale ŭ vyniku tudy nie trapiŭ. Potym žyćcio ź milicyjaj vyrašyŭ nie źviazvać i pajšoŭ u budaŭničuju śfieru.
