Mužčyna, jaki zalez na kran u centry Minska, spuściŭsia i byŭ zatrymany milicyjaj
25-hadovy žychar Viciebska kala piaci hadzin pravioŭ na viežavym kranie na stadyjonie «Dynama». Jon patrabavaŭ vypłacić jamu zapazyčanaść pa zarobku, a taksama vyklikać reparcioraŭ z telebačańnia.
19.15
Jak paviedamlaje žurnalist NN ź miesca zdareńnia, Dźmitryja Stalarova pavieźli ŭ Leninski RAUS.
Pa słovach pres-sakratara milicyi Alaksandra Łastoŭskaha, viciebčuk byŭ sudzimy za kradziež instrumientaŭ, i ŭ Viciebsku jon znachodziŭsia pad padpiskaj ab niavyjeździe.
Suma zapazyčanaści, jakuju patrabavaŭ vypłacić Dźmitryj — kala 40 młn rubloŭ. Pa słovach Łastoŭskaha, hetyja hrošy jamu vinnyja pryvatnyja firmy, ź jakimi Stalaroŭ pracavaŭ pa damovach padradu. Jak śćviardžajuć pradstaŭniki firmaŭ, patrabavańni pa damovach vykananyja nie byli, tamu hrošaj Dźmitryj nie atrymaŭ. Pa hetych faktach budzie pravodzicca pravierka.
Taksama Łastoŭski zaznačyŭ, što viciebčuk całkam adekvatny, ćviarozy, ničoha nie ŭžyvaŭ. Što da nastupstvaŭ jaho ŭčynku, to da adkaznaści jon, chutčej za ŭsio, budzie pryciahnuty prynamsi za toje, što parušyŭ padpisku ab niavyjeździe.
18.40
Dźmitryja pierasadzili ŭ milicejskuju mašynu. Padjechaŭ načalnik minskaj milicyi Alaksandr Barsukoŭ. Žurnalistaŭ prosiać nie zdymać.
18.25
Dźmitryj spuściŭsia z krana i sieŭ u mašynu z zaciemnienymi šybami, jakaja padjechała raniej. Chto ŭ joj i pra što idzie havorka ŭnutry, pakul nieviadoma. Taksama padjechała milicejskaja mašyna.
Stalarova sustrakali dvoje supracoŭnikaŭ siłavych struktur, pieraapranutyja ŭ budaŭnikoŭ. Pavodle słoŭ Łastoŭskaha, heta było zroblena «ŭ metach jahonaj ža biaśpieki».
18.15
Viciebčuk pačaŭ spuskacca z krana.
18.10
Pieramoŭščyk pryvioŭ dvuch čałaviek, jakich paprasiŭ Dźmitryj, i pieradaŭ adnamu ź ich telefon, z dapamohaj jakoha kamunikuje z maładym čałaviekam.
Dźmitryj zajaŭlaje, što «nie źlezie, pakul nie vyrašyć svaju prablemu».
Dva čałavieki, jakich patrabavaŭ Stalaroŭ
17.45
Viciebčuk paprasiŭ adahnać milicejskuju mašynu, kab dać kamientar ANT. Televizijščyki rychtujuć aparaturu dla žyvoha efiru.
17.25
Stała viadoma, što maładoha čałavieka zavuć Dźmitryj Michajłavič Stalaroŭ, jon 1991 hoda naradžeńnia. U astatnim situacyja zastajecca bieź źmienaŭ.
Pieramoŭščyk
16.35
Jak paviedamlajuć karespandenty NN ź miesca zdareńnia, na terytoryju «Dynama» prapuścili tolki žurnalistaŭ telekanała ANT. Pa słovach Łastoŭskaha, małady čałaviek paprasiŭ mienavita ich.
Na pytańnie, ci moža chtości da jaho padniacca, Łastoŭski adkazaŭ, što viciebčuk začyniŭ luk sa svajho boku, tamu zrabić heta nie ŭjaŭlajecca mahčymym.
16.25
Pa słovach Alaksandra Łastoŭskaha, ciapier z mužčynam viaducca pieramovy, jaho uprošvajuć źleźci, kab praciahnuć razmovu ŭ biaśpiečnaj abstanoŭcy. Stała viadomaja suma, jakuju vinavatyja viciebčuku na pracy, — kala 10 młn rubloŭ.
Akramia nieviadomaha maładoha čałavieka na kranie znachodzicca i sam kranaŭščyk. Nieviadoma, jak mužčyna moh zaleźci na kran, bo tam byŭ kranaŭščyk. Mahčyma, kranaŭščyk u hety čas adychodziŭ.
Da stadyjona «Dynama» prybyła vialikaja kolkaść supracoŭnikaŭ milicyi. Jany zabaraniajuć žurnalistam vieści zdymki zdareńnia. Milicyjanty śpiarša zabrali pašparty ŭ žurnalistaŭ, adnak potym viarnuli dakumienty.
Jak paviedamiŭ pres-sakratar HUUS Minharvykankama Alaksandr Łastoŭski, asoba maładoha čałavieka ŭstanoŭlena — heta 25-hadovy žychar Viciebska. Jon — adździełačnik, pryjechaŭ u Minsk ź Viciebskaj vobłaści, pa miescy pracy jamu paŭhoda nie vypłočvajuć zarobak.
