Kryścina Vituška: U złych ludziej mohuć być dobryja dzieci. Pry adnoj umovie
Ja lublu paŭtarać frazu z mulcika pra Funcika, jakaja hučyć pryblizna tak: «Navat u złych ludziej mohuć być dobryja dzieci, jakija lubiać cyrk». U našych realijach hetaja mietafara značyć, što ruskamoŭnaja siamja i kultura z adukacyjaj (pry adsutnaści pierakanańniaŭ, što dzieci i sabaki ad naradžeńnia ruskamoŭnyja) pry adkrytaści da śvietu navuki i kultury, pry adekvatnym pačućci spraviadlivaści mohuć vyraścić biełaruskamoŭnych i/ci značnych dla raźvićcia Biełarusi ludziej.
U toj ža čas vychadcy ź biełaruskamoŭnych kałhasaŭ, vychavanyja na BT i BRSM bieź sistemy ahulnačałaviečych kaštoŭnaściaŭ z pradažnym i truślivym mientalitetam nikoli nie buduć ujaŭlać kaštoŭnaści ni dla Biełarusi, ni dla luboj inšaj krainy, jak by nie treśli jaje nacyjanalnymi ci dziaržaŭnymi simvałami. Heta z adnaho boku. Ale z druhoha, tym samym cudoŭnym inšamoŭnym ludziam, kab paviarnucca tvaram i sercam da Biełarusi, treba adniekul pra jaje daviedacca, adčuć prynaležnaść, pavahu i honar. Da žyvoj, a nie miortvaj Biełarusi.
Finy, čechi mieli žyvuju finskuju, češskuju viosku. Našyja vioski siońnia frahmientarna žyvyja i frahmientarna biełaruskija. Adpaviedna, žyćciadajnaj krynicaj pavinny być niejkija inšyja sacyjalnyja słai.
Ja baču budučyniu za biełaruskimi siemjami, utvoranymi ajcišnikami, finansistami, lekarami, inžynierami, markietołahami i h.d. — nie prafiesijnymi biełarusami. Ludzi, jakija adbylisia prafiesijna, jakija zarabili, a nie atrymali na durniak svajo žytło, jakija majuć ułasny kavałak ziamli, jakija rehularna bačać śviet i zapatrabavanyja ŭ im, ale śviadoma abirajuć Biełaruś, jakija majuć jakasnuju adukacyju, pačućcie spraviadlivaści, sumleńnie i honar — jany i jość hienafond Biełarusi i katalizatar raźvićcia.
Dla takich ludziej vychavańnie dziaciej pa-biełarusku — rašeńnie, jakoje prymajecca apryjory; finansavańnie biełaruskich sistemaŭtvaralnych prajektaŭ u halinie kultury, navuki, inavacyjaŭ, biznesu, dziaržaŭnaha ładu — apryjory. Takich ludziej nie mała. Pieryjadyčna jany pačuvajuć siabie stomlenymi i samotnymi, niezapatrabavanymi i vykinutymi z masavych pracesaŭ, padajuć, ale padymajucca i iduć napierad i ŭhoru, ciahnučy za saboj usich.
* * *
Kryścina Vituška — markietołah, staršynia apiakunskaj rady himnazii №23. U studenckim minułym — lidarka Zadzinočańnia biełaruskich studentaŭ.
