Католікі сёння адзначаюць Звеставанне (Дабравешчанне)
За дзевяць месяцаў да Божага Нараджэння Касцёл адзначае свята Звеставання Пана.
Гэта дзень, у які Арханёл Габрыэль абвясціў дзяўчыне Марыі аб тым, што яна стане Маці Бога, і ў гэты дзень пад яе сэрцам з’явіўся Хрыстос. Дата, аднак, умоўная, як і дзень нараджэння Хрыста.
Ва Усходніх Цэрквах гэтае свята адзначалі ўжо ў V стагоддзі, а на Захадзе — з часоў пантыфікату Грыгорыя Вялікага (VІІ ст.).
У энцыкліцы Evangelium vitae, абвешчанай 25 сакавіка 1995 г., Ян Павел ІІ прапанаваў штогод у гэта свята адзначаць Дзень жыцця, каб звярнуць увагу грамадскасці на яго каштоўнасць. Для таго, каб кожная жанчына і ўсе людзі, нягледзячы ні на якія складанасці і праблемы ў жыцці, на ўзор Марыі заўсёды казалі «так» новаму жыццю з моманту зачацця.
У апошнія гады ў Беларусі пашыраецца добрая традыцыя духоўнага ўсынаўлення. Ва ўрачыстасць Звеставання Пана (а таксама і ў іншыя марыйныя святы) многія вернікі бяруць на сябе абавязак на працягу дзевяці месяцаў маліцца за дзіця, якому пагражае аборт.
