Прэм'ер Нідэрландаў: Наш саюзнік у Беларусі — гэта людзі, якія вераць у свабоду
«Нідэрланды заўсёды выбудоўвалі сваю палітыку ў дачыненні да Беларусі на каштоўнаснай аснове. І мы не збіраемся мяняць гэты падыход у будучыні», — заявіў прэм'ер-міністр Галандыі Марк Рутэ лідару Аб'яднанай грамадзянскай партыі Анатолю Лябедзьку.
Сустрэча адбылася падчас Кангрэсу нідэрландскай Народнай партыі за дэмакратыю і свабоду. Лідар АГП у сваю чаргу падкрэсліў, што «ключ да пераменаў у Беларусі — гэта сумленныя, свабодныя выбары па стандартах АБСЕ. Калі гэты падыход будзе пакладзены ў аснову новай еўрапейскай стратэгіі, то нас усіх чакае поспех. Калі ўсё звядзецца да прызначэння ў псеўдапарламент некалькіх кіраваных апазіцыянераў, то сітуацыя будзе закансервавана».
Прэм'ер-міністр Нідэрландаў адзначыў: «Наш стратэгічны саюзнік у Беларусі — гэта людзі, якія вераць у дэмакратыю і свабоду». Ён паабяцаў Анатолю Лябедзьку, што абавязкова прачытае кнігу, якую палітык напісаў у СІЗА КДБ.
З прэм'ер-міністрам Нідэрландаў Маркам Рутэ
У мерапрыемствах, якія суправаджаюць кангрэс Народнай партыі, бралі ўдзел не толькі палітыкі, але і эксперты па розных кірунках, прадстаўнікі грамадзянскай супольнасці. У прыватнасці вялікі рэзананс мела дыскусія пра тое, якой быць еўрапейскай эканоміцы ў найбліжэйшыя дзесяць гадоў. Ад Беларусі ў ёй браў удзел кіраўнік Цэнтра Мізэса Яраслаў Раманчук. Сярод гасцей з'езду былі палітыкі, эканамісты з Сербіі, Македоніі, Туніса, Польшчы і іншых краін.
