Premjer Niderłandaŭ: Naš sajuźnik u Biełarusi — heta ludzi, jakija vierać u svabodu
«Niderłandy zaŭsiody vybudoŭvali svaju palityku ŭ dačynieńni da Biełarusi na kaštoŭnasnaj asnovie. I my nie źbirajemsia mianiać hety padychod u budučyni», — zajaviŭ premjer-ministr Hałandyi Mark Rute lidaru Abjadnanaj hramadzianskaj partyi Anatolu Labiedźku.
Sustreča adbyłasia padčas Kanhresu niderłandskaj Narodnaj partyi za demakratyju i svabodu. Lidar AHP u svaju čarhu padkreśliŭ, što «kluč da pieramienaŭ u Biełarusi — heta sumlennyja, svabodnyja vybary pa standartach ABSIE. Kali hety padychod budzie pakładzieny ŭ asnovu novaj jeŭrapiejskaj stratehii, to nas usich čakaje pośpiech. Kali ŭsio źviadziecca da pryznačeńnia ŭ psieŭdaparłamient niekalkich kiravanych apazicyjanieraŭ, to situacyja budzie zakansiervavana».
Premjer-ministr Niderłandaŭ adznačyŭ: «Naš stratehičny sajuźnik u Biełarusi — heta ludzi, jakija vierać u demakratyju i svabodu». Jon paabiacaŭ Anatolu Labiedźku, što abaviazkova pračytaje knihu, jakuju palityk napisaŭ u SIZA KDB.
Z premjer-ministram Niderłandaŭ Markam Rute
U mierapryjemstvach, jakija supravadžajuć kanhres Narodnaj partyi, brali ŭdzieł nie tolki palityki, ale i ekśpierty pa roznych kirunkach, pradstaŭniki hramadzianskaj supolnaści. U pryvatnaści vialiki rezanans mieła dyskusija pra toje, jakoj być jeŭrapiejskaj ekanomicy ŭ najbližejšyja dziesiać hadoŭ. Ad Biełarusi ŭ joj braŭ udzieł kiraŭnik Centra Mizesa Jarasłaŭ Ramančuk. Siarod haściej źjezdu byli palityki, ekanamisty ź Sierbii, Makiedonii, Tunisa, Polščy i inšych krain.
