Мітынг у Слуцку забаронены
Слуцкі райвыканкам не даў дазволу на правядзенне мітынгу «За Свабоду слова і годнае жыццё», заяўку на які даслалі сябры руху «За свабоду», паведамляе прэс-служба арганізацыі.
«Слуцкі раённы выканаўчы камітэт забараняе правядзенне мітынгу «За Свабоду слова і годнае жыццё» 7 траўня з 14 да 15 гадзінаў у гарадскім парку культуры і адпачынку», — зачытала адказ райвыканкама заяўніку супрацоўніца ўстановы.
Па яе словах, там запланаваныя мерапрыемствы: з 12 да 15 канцэрт дзіцячых калектываў, з 15 да 18 танцэвальны марафон «У стылі рэтра».
Адказ, па словах супрацоўніцы райвыканкама, быў адпраўлены 28 красавіка, але пакуль не паступіў заяўніку.
«Гэта абсалютна прадказальны і чаканы адказ», — адрэагаваў на забарону абласны каардынатар руху «За свабоду» Віталь Амяльковіч.
