Бязвізавы рэжым у Беларусі могуць падоўжыць да 12 дзён
Такой магчымасьці не выключае першы намесьнік міністра замежных спраў Беларусі Андрэй Еўдачэнка. 30 сакавіка, адказваючы на пытаньне ўдзельнікаў сэмінару аб міжнароднай дзейнасьці Беларусі, арганізаванага Нацыянальным сходам, ён сказаў:
«Такая магчымасьць цяпер вывучаецца. Мы выступаем за павелічэньне тэрміну. Ёсьць прапанова ўдвая павялічыць тэрмін знаходжаньня на нашай тэрыторыі замежнікаў бязь візы — зь пяці дзён удвая, а з улікам выходных да дванаццаці каляндарных сутак.
Але патрэбны нейкі час, каб улічыць усе аспэкты. Скажу шчыра, няпроста прымалася рашэньне і аб пяці днях. Аднак думка пра тое, каб падоўжыць замежнікам бязь візы час знаходжаньня ў Беларусі, у нас ёсьць».
5-дзённы бязьвізавы рэжым пачаў дзейнічаць 12 лютага. Ён прадугледжвае бязьвізавы ўезд у Беларусь праз Нацыянальны аэрапорт «Менск» на тэрмін да 5 сутак для грамадзян 80 краін. Бязьвізавы рэжым распаўсюджваецца на 39 краін Эўропы, а таксама ЗША, Канаду, Інданэзію, Японію, Індыю і іншыя дзяржавы. На працягу году турысты могуць прыяжджаць у Беларусь бязь візы на пяць дзён неабмежаваную колькасьць разоў.
Сёньня БЕЛТА са спасылкай на начальніка ўпраўленьня спорту і турызму Менскага гарвыканкаму Сяргея Фурманава паведаміла, што бязь віз сталіцу наведалі каля 6 тысяч турыстаў.
