Biaźvizavy režym u Biełarusi mohuć padoŭžyć da 12 dzion
Takoj mahčymaści nie vyklučaje pieršy namieśnik ministra zamiežnych spraŭ Biełarusi Andrej Jeŭdačenka. 30 sakavika, adkazvajučy na pytańnie ŭdzielnikaŭ seminaru ab mižnarodnaj dziejnaści Biełarusi, arhanizavanaha Nacyjanalnym schodam, jon skazaŭ:
«Takaja mahčymaść ciapier vyvučajecca. My vystupajem za pavieličeńnie terminu. Jość prapanova ŭdvaja pavialičyć termin znachodžańnia na našaj terytoryi zamiežnikaŭ biaź vizy — ź piaci dzion udvaja, a z ulikam vychodnych da dvanaccaci kalandarnych sutak.
Ale patrebny niejki čas, kab uličyć usie aspekty. Skažu ščyra, niaprosta prymałasia rašeńnie i ab piaci dniach. Adnak dumka pra toje, kab padoŭžyć zamiežnikam biaź vizy čas znachodžańnia ŭ Biełarusi, u nas jość».
5-dzionny biaźvizavy režym pačaŭ dziejničać 12 lutaha. Jon praduhledžvaje biaźvizavy ŭjezd u Biełaruś praz Nacyjanalny aeraport «Miensk» na termin da 5 sutak dla hramadzian 80 krain. Biaźvizavy režym raspaŭsiudžvajecca na 39 krain Eŭropy, a taksama ZŠA, Kanadu, Indaneziju, Japoniju, Indyju i inšyja dziaržavy. Na praciahu hodu turysty mohuć pryjaždžać u Biełaruś biaź vizy na piać dzion nieabmiežavanuju kolkaść razoŭ.
Siońnia BIEŁTA sa spasyłkaj na načalnika ŭpraŭleńnia sportu i turyzmu Mienskaha harvykankamu Siarhieja Furmanava paviedamiła, što biaź viz stalicu naviedali kala 6 tysiač turystaŭ.