Лукашэнка патлумачыў, навошта бюджэтнікаў адпраўляюць прыбіраць каменне з палёў
Палітык заявіў, што тэхніка ў Беларусі ёсць, але выкарыстоўваць яе даражэй.
Фота: БелТА
Аляксандр Лукашэнка, наведваючы Касцюковіцкі раён, адказаў незалежным СМІ, якія асвятлялі тэму ўборкі камянёў на палях студэнтамі, вайскоўцамі і бюджэтнікамі.
«Збеглыя мярзотнікі заклапаціліся, што да збору камянёў на палях у нас прыцягваюць людзей — у тым ліку школьнікаў, студэнтаў, вайскоўцаў. Што ў нас, маўляў, тэхнікі няма», — адзначыў Лукашэнка, якога цытуе БелТА.
Паводле яго слоў, такая тэхніка ў Беларусі ўсё ж ёсць, аднак выкарыстоўваць яе неабходна эканомна.
«Але трэба грошы лічыць. Не ўсюды яе запусціш», — заявіў палітык, адзначыўшы, што такую тэхніку мэтазгодна выкарыстоўваць на глебах, дзе шмат камянёў. У астатніх выпадках лепш прыбіраць камяні ўручную.
Лукашэнку далажылі, што беларуская машына для збору камянёў на 40% таннейшая за польскі аналаг, а яе лакалізацыя складае 85%.
Чытайце таксама:
У Магілёве прыбіраць камяні з палёў адправілі хакеістаў
У Мінскім раёне на прыбіранне камянёў з палёў мабілізавалі асуджаных на «хатнюю хімію»
