Следства: Ракета, якая збіла Боінг над Данбасам, дастаўлена з Расіі
Раён, адкуль магла быць запушчана ракета, што збіла «Боінг»
«Боінг» малайзійскіх авіяліній быў збіты ракетай з комплексу «Бук», размешчанага прыкладна за шэсць кіламетраў ад горада Снежнае. Пра гэта прадстаўнікі Міжнароднай следчай групы паведамілі на сустрэчы са сваякамі ахвяраў крушэння, паведамляюць RTL News і Nos.
Гэтая тэрыторыя знаходзілася пад кантролем прарасійскіх сепаратыстаў.
Вытворца «Бука» «Алмаз-Антэй» сцвярджаў, што ракета была запушчана з раёна вёскі Зарошчанскае (яна знаходзіцца ніжэй за Шахцёрск).
Nos асобна удакладняе, што «Бук» ва Украіну даставілі з Расіі. Пасля таго, як «Боінг» быў збіты, машыну вярнулі ў РФ.
Самалёт «Боінг» быў збіты над Украінай 17 ліпеня 2014 года. У выніку загінулі 298 чалавек, якія знаходзіліся на борце.
Следчыя рэканструявалі траекторыю палёту ракеты, сабраўшы найдрабнейшыя кавалачкі самалёта.
Расія паслядоўна адмаўляла сваю датычнасць да катастрофы і запускала ў СМІ розныя альтэрнатыўныя версіі падзей.
