Фінскі нейрахірург распавёў пра смерць мозгу Карымава адразу пасля інсульту
Фінскі нейрахірург Юха Хернесніемі распавёў, што смерць мозгу прэзідэнта Іслама Карымава наступіла амаль адразу пасля інсульту. Па словах Хернесніемі, калі ён прыляцеў у Ташкент, «пацыент быў фактычна мёртвы, гэта была смерць мозгу».
Пахаванне Іслама Карымава ў Самаркандзе 3 верасня, Reuters.com
Як распавёў доктар, 27 жніўня яму патэлефанаваў яго вучань з Узбекістана і папрасіў прыехаць. Па словах Хернесніемі, ён рабіў шмат аперацый за мяжой, і ў гэтай просьбе не было нічога незвычайнага. Па доктара даслалі прыватны самалёт.
Калі Хернесніемі прыляцеў у Ташкент, «аперацыя ўжо не мела на тым этапе сэнсу». «Я не лічыў разумным працяг лячэння», — распавёў ён.
Згодна з медыцынскім заключэннем, апублікаваным уладамі Узбекістана, Іслам Карымаў быў шпіталізаваны з інсультам 27 жніўня. У ноч на 28-га ў Ташкенце сабраўся кансіліум з Расіі, Германіі, Манака, а таксама прыехаў Юха Хернесніемі з Фінляндыі. «Па выніках кансіліуму сумесна з узбекскімі спецыялістамі была вызначана далейшая тактыка лячэння», — гаварылася ў заключэнні. Па афіцыйных дадзеных, смерць наступіла ўвечары 2 верасня.