Знайшлі бязбольны сродак супраць камянёў у нырках
Амерыканскія даследчыкі з універсітэта ў Х'юстане высветлілі, што натуральны раслінны экстракт здольны растварыць аксалат кальцыя — кампанент камянёў у нырках чалавека.
Фота lechenie-simptomy.ru.
Пра сваё адкрыццё навукоўцы распавялі ў артыкуле, апублікаваным у часопісе Nature.
Хімікі вызначылі, што злучэнне, званае гідраксіцытратам, з'яўляецца эфектыўным інгібітарам росту крышталяў аксалату кальцыя і пры пэўных умовах можа растварыць іх. Звычайна людзям, схільным да мачакаменнай хваробы, рэкамендуюць прымаць цытрат у форме біядабаўкі, аднак у некаторых пацыентаў узнікаюць сур'ёзныя пабочныя эфекты. Даследчыкі з дапамогай атамна-сілавой мікраскапіі вывучылі ўзаемадзеянне паміж крышталямі як цытрату, так і гідраксіцытрату і аксалату кальцыя.
Навукоўцы звярнуліся да тэорыі функцыяналу шчыльнасці — метаду разліку электроннай структуры сістэм, якія складаюцца з многіх часціц. З яго дапамогай яны вызначылі, як гідраксіцытрат уздзейнічае на кальцый. Аказалася, што ён фармуе моцную сувязь з крышталічнымі паверхнямі і выклікае вызваленне атамаў кальцыя, што прыводзіць да растварэння крышталя.
Даследчыкі правялі эксперыменты на сямі пацыентах, якія прымалі біядабаўкі на працягу трох дзён. Вынікі паказалі, што гідраксіцытрат лёгка выводзіцца з мачой, што з'яўляецца ўмовай дзейснай работы прэпарата. Аднак хімікі падкрэсліваюць, што для стварэння паўнавартаснага лекавага комплексу неабходныя дадатковыя выпрабаванні на бяспеку, неабходную дазіроўку і эфектыўнасць.
