Francyja zmahajecca za admienu śmiarotnaj kary va ŭsim śviecie. Artykuł Mišela Reniery, pasła Francyi ŭ Biełarusi

Pytańnie admieny śmiarotnaha pakarańnia ŭsio čaściej uźnimajecca va ŭsim śviecie.

Na siońnia bolš čym u 2/3 krain śvietu, a kali kazać dakładniej, to ŭ 141 dziaržavie, nie ŭžyvajecca śmiarotnaja kara.

U 97 krainach jana całkam admienienaja, jašče ŭ 8 dziaržavach nie prymianiajecca za ahulnakryminalnyja złačynstvy, a ŭ 36 krainach na śmiarotnaje pakarańnie nakładzieny maratoryj.

Kolkaść krain, u jakich admaŭlajucca ad śmiarotnaj kary jak vyšejšaj miery pakarańnia pavialičvajecca.

Ad pačatku 2012 hoda Manholija i Bienin ratyfikavali Druhi fakultatyŭny pratakoł da Mižnarodnaha paktu ab hramadzianskich i palityčnych pravach, nakiravany na admienu śmiarotnaj kary.

U ZŠA jašče dva štaty dałučylisia da hetaha ruchu: u sakaviku Ilinojs, a ŭ krasaviku Kaniektykut. (Jon staŭ siamnaccatym štatam, u jakim nie ŭžyvajecca śmiarotnaje pakarańnie!)

Razam z tym, ad 2011 hoda ŭ 23 krainach śmiarotnyja prysudy byli pryviedzienyja ŭ vykanańnie.

Dziesiacihodździami prychilniki i praciŭniki śmiarotnaha pakarańnia aktyŭna abmieńvajucca arhumientami «za» i «suprać».

Mnie zdajecca, niama sensu paŭtarać toje, što ŭžo było tysiačy razoŭ napisana. Kali kazać asabista pra mianie, to, na moj pohlad, heta pytańnie sumleńnia. Kali pravasudździe vykarystoŭvaje tyja ž mietady, što i złačyncy, heta nie ŭźvialičvaje čałaviectva.

Z pazicyi chryścijanina dla jakoha žyćcio — heta najvyšejšy dar ad Boha, nichto i ni pry jakich abstavinach nie maje prava jaho adymać.

Paŭtaraju, nichto i nikoli.

Padziei najnoŭšaj historyi pakazvajuć, što isnavańnie śmiarotnaha pakarańnia nijak nie ŭpłyvaje na namiery złačyncaŭ ździajśniać samyja hniusnyja i ahidnyja złačynstvy. Biełarusy heta vydatna viedajuć.

Amierykancy taksama nikoli nie zabuduć 11 vieraśnia 2001.

Letaś u Maroka, krainie, dzie ŭsio jašče ŭžyvajecca śmiarotnaje pakarańnie, byŭ ździejśnieny terarystyčny akt. Jon zabraŭ žyćci vaśmi francuzaŭ. Adnak siemji paciarpiełych paprasili ŭ marakanskaha pravasudździa nie ŭžyvać vyšejšuju mieru pakarańnia.

Sioleta Francyja vyrašyła zapuścić šyrokamaštabnuju kampaniju pa baraćbie za admienu śmiarotnaha pakarańnia.

Jana budzie asabliva aktyŭnym hulcom na mižnarodnych forumach, u tym liku pad ehidaj AAN, a taksama ŭ ramkach V Suśvietnaha kanhresa suprać śmiarotnaha pakarańnia, jaki projdzie ŭ Madrydzie ŭ červieni 2013. Vykarystoŭvajučy kožnuju mahčymaść, pry sumiesnych kansultacyjach ź jeŭrapiejskimi partniorami, Francyja budzie pravodzić mierapryjemstvy, skiravanyja na pryciahnieńnie da hetaj prablemy ŭvahi nasielnictva i palityčnych kiraŭnikoŭ.

Hałoŭnaja meta ambitnaja i jasnaja: admiena śmiarotnaha pakarańnia va ŭsim śviecie.

Mišel Reniery, pasoł Francyi ŭ Biełarusi

Chočaš padzialicca važnaj infarmacyjaj
ananimna i kanfidencyjna? Pišycie redaktaru
«Našaj Nivy» ŭ TH